پارتی و ئێكەتی ل سەر پێنج خالان رێككەفتن

ئه‌ڤرۆ ئێكشه‌مبى هه‌ردوو مه‌كته‌بێن سیاسییێن پارتى و ئێكه‌تییێ ل سلێمانییێ كۆمبوون و ل دووڤ راگه‌هاندنه‌كێ، هه‌ردوو لایه‌ن پشته‌ڤانییێ ل كرنا هه‌لبژارتنان ل وى ژڤانێ كر یێ كو دێ ژلایێ سه‌رۆكێ هه‌رێما كوردستانێڤه‌ هێته‌ ده‌ستنیشانكرن.

دخاله‌كا راگه‌هاندنێدا هاتییه‌، بریار هاته‌ دان پرۆسه‌یا رێكخستنا هێزێن پێشمه‌رگه‌ى یا به‌رده‌وام بیت.

ده‌قێ راگه‌هاندنێ :

كۆمبوونا هه‌ردوو مه‌كته‌بێن سیاسییێن ئێكه‌تى نیشتیمانى كوردستان و پارتى دیموكراتى كوردستان ل ده‌باشان هاته‌ كرن، پشتى گوتوبێژا ره‌وشا ده‌ڤه‌رێ ب گشتى و عیراق و كوردستانێ ب تایبه‌تى، هه‌ردوو لایان دووپاتى ل پاراستنا قه‌واره‌یێ هه‌رێما كوردستانێ و مافێن وێ یێن ده‌ستوورى كر و دێ هه‌موو شیانان بۆ به‌رهنگاربوونا ئاسته‌نگان ژ پێخه‌مه‌ت ژیانا وه‌لاتییان و چاره‌سه‌ركرنا ئاریشه‌یان ئێخنه ‌كار.

ب ئاراسته‌یێ زێده‌تر چركرنا بزاڤێن هه‌ردوو لایان ل سه‌ر ئه‌ڤان خالێن خوارێ رێككه‌ڤتین .

1 – هه‌ردوو لایه‌ن پشته‌ڤانییێ ل كرنا هه‌لبژارتنێن په‌رله‌مانێ كوردستانێ ل وى ژڤانێ كر یێ كو دێ ژلایێ سه‌رۆكێ هه‌رێما كوردستانێڤه‌ هێته‌ ده‌ستنیشانكرن، پشتى دانوستاندكرنا دگه‌ل لایه‌نێن سیاسییێن هه‌رێما كوردستانێ.

2 – بۆ زێده‌تر خزمه‌تكرنا خه‌لكێ كوردستانێ ژ هه‌موو لایه‌كیڤه‌، ئاریشه‌ و جۆداهییێن بچووك بده‌نه‌ لایه‌كى و پێكڤه‌ به‌ره‌ڤ چاره‌سه‌ركرنا ئاریشه‌یان بچن.

3 – مه‌ بریاردا پرۆسه‌یا رێكخستنا هێزێن پێشمه‌رگه‌ى یا به‌رده‌وام بیت.

4 – مه‌ هه‌ردوو لایان بریاردا پشته‌ڤانییێ ل رێككه‌ڤتنێن كابینه‌یا نه‌هێ یا حكومه‌تا هه‌رێما كوردستانێ بكه‌ین.

5 – ژ پێخه‌مه‌ت زێده‌تر لێك نێزیكبوون و رووبرووبوونا ئاسته‌نگان و سه‌ركه‌ڤتن ب سه‌ر واندا، مه‌ بریاردا ب رۆحییه‌ته‌كا كوردستانى و نیشتیمانپه‌روه‌رانه‌ به‌رده‌وامییێ ب كۆمبوونێن دوو قۆلى و هه‌ماهه‌نگییا دگه‌ل هه‌موو لایه‌نان بده‌ین.