مەسرور بارزانی، سەرۆکێ حکومەتا هەرێما کوردستانێ، ئەڤرۆ د سالڤەگەڕا جینۆسایدا بارزانییان پەیامەك بەلاڤكر.
دەقێ پەیاما سەرۆکێ حکومەتا هەرێما کوردستانێ؛
ئەڤرۆ 40 سال ب سەر ئێك ژ دڕندەترین تاوانێن ڕژێما پێشتر یا عیراقێ دەربازبوون كو جینۆسایدكرنا هزاران مرۆڤێن بێ تاوانێن بارزانییا بوون، ب تنێ ژبەر هندێ كو كورد و بارزانی بوون، هاتنە دەستەسەركرن و پاش ل بیابانێن عیراقێ ب ساخی هاتنە بن ئاخكرن.
ئەڤ تاوانا مەزن، پشكەك بوو ژ تاوانێن ڕژێما ژ ناڤچوویا بەعس دژی گەلێ كوردستانێ، كو بێسەروشینكرن و جینۆسایدكرنا كوردێن فەیلی و ئەنفالكرییێن دەڤەرێن بارزان و گەرمیان و بادینان و کیمیابارانکرنا هەلەبجە و چەندین دەڤەرێن دی یێن كوردستانێ، زنجیرەك بوو ژ تاوانێن هۆڤانە ب دژی وەلاتییێن كوردستانێ هاتینە ئەنجامدان.
جهێ دلگرانییێ یە، كو پشتی دەربازبوونا 40 سالان ب سەر ئەڤێ كارەساتێ، كو هێشتا هندەك كەس هەنە ب هەمان عەقلیەت و هزرا شۆڤێنی و سەردەمێ ئەنفالێ، دڤێت مافێن ڕەوا و دەستووریێن گەلێ كوردستانێ پێشیل و بن پێ بكەن، د دەمەكیدا وەلاتییێن كوردستانێ هزاران قوربانی داینە و بەرهنگاری چەندین تاوان و كارەساتێن مەزن بووینە ل پێناڤ بەرگریكرن د ناسنامەیا نەتەوەیی و نیشتیمانییا خۆ كو چ جاران دەستان ژێ بەرنادەن.
دەڤەرا بارزان ئێكە ژ وان دەڤەرێن كوردستانێ كو د سەدەیا بووریدا ب دەهان جاران بەرهنگاری وێرانكرن و كومەلكۆژی و جینۆسایدێ بووینە، بەلێ ئەو هەمی زۆلم و ستەم و تاوانە، نەشیاینە ئیرادەیا نەتەوەیی و گیانێ خۆڕاگری و بەرگرییێ ل ئەوێ دەڤەرێ ژ ناڤببەن، هەمی دەما دژی زۆلم و ستەمێ بەرەڤانی كرییە، ژبەر خۆڕاگری و قوربانیدان و خوینان پاقژ یا شەهیدێن مە، ئەڤ قەوارەیێ دەستوورییێ نوكە یێ هەرێما كوردستانێ هاتییە بەرهەمئینان كو پێدڤییە ب هەمی ڕەنگا بەرەڤانییێ لێ بكەین و زێدەتر گەشەیێ پێ بدەین.
د سالڤەگەڕا ئەڤێ كارەساتێ و هەلكەڤتا خەمگیندا، داخوازییا هەرێما كوردستانێ ژ بۆ قەرەبووكرنا شایستەییێن ماددی و مەعنەوی یێن مالبات و كەسوكارێن ئەنفالكرییان و وەلاتییێن ستەم لێ كری یێن كوردستانێ ژ لایی حكومەتا عیراقێ لدووڤ دەستووری دووپات دكەین. پێدڤییە ئەم هەمی كار بۆ نەهێلانا هزرا ئەنفال و دووبارەنەبوونا ئەڤان تاوانان بكەین.
د سالڤەگەڕا جینۆسایدكرنا بارزانییان، سەرێ ڕێزێ بۆ بارزانییێن ئەنفالكری و هەمی شەهیدێن كوردستانێ د چەمینین و هەمی دەما ڕێزێ ل ئەڤێ بیرەوەرییێ دگرین.
هەروەسا ڕێز و پێزانین بۆ كەسوكار و مالباتێن سەر بلند یێن ئەنفالكرییان هەیە كو بەرهەنگاری ڕۆژێن زۆر دژوار بووینە بەلێ شیاینە ب سەربلندانە زارۆك و نفشێ خۆ پێ بگەهینن. سوپاسییا جامێری و هەوارچوونا وەلاتێن قاهرەمان و نیشتیمانپەروەرێن هەولێر و دەوروبەرێن دەڤەرێن دی یێن كوردستانێ دكەم كو ددەمێ ئەڤێ كارەساتێدا هاریكاری و هەڤسوزییا كەسوكارێن ئەنفالكریێن بارزانییان بوون.
