ل 31ی تیرمەھا سالا 1983، ڕژێما بەعسا ژناڤچوویی ئێک ژ مەزنترین تاوانێن دژی مرۆڤایەتیێ ل دژی وه‌لاتییێن سڤیلێن کوردستانێ ئەنجامدا.
کو ئەو ژی تاوانا جینۆسایدکرنا 8 هزار بارزانییان بوو، کو بتنێ گوننەھا وان ئەو بوو كو کورد و بارزانی بوون.
تاوانا جینۆسایدکرنا 8 ھزار بارزانیان ژ ڕەگەزێ نێر، کو پێش وەخت ژ لایێ ڕژیما فاشی یا بەغدا ڤە ل دیانا، حەریرێ، قۆشتەپە و بەحرکێ، ل ئوردیگایێن زۆرەملی ئاکنجی کربوون، دەستپێکا بەڕنامەکێ داڕێژتیێ ڕژێما سەدامێ دکتاتۆر بوو، ژبۆ جینۆسایدکرنەکا بەرفرەھتر یا وه‌لاتییێن کوردستانێ، کو د چەند قۆناغێن جودا جودا دا، ل ژێر ناڤێ ئەنفالێن ڕەش ب جهئینا و ب دەھان ھزار ژن و زەلام و زاڕۆکێن کوردێن بێ گوننەھ ڕاپێچکرن و بەرەڤ بیابانێن ژێریا عیراقێ برن و ب ساخی و ب دڕندەترین شێوە بن ئاخکرن.
جینۆسایدکرنا 8 هزار بارزانییان تاوانەکا ڕەگەزپەرستیانە یا ڕژێما فاشی یا بەغدا بوو، پێخەمەت سڕینا ناسنامە و قڕکرنا مللەتێ کورد، ئەو ژی ب بڕێیا ژناڤبرنا داینەمۆیێ ھێزا جۆری یا شۆڕه‌ش و سەرھەلدانێن گەلێ کورد، کو ئەو ژی بارزانی بوون.
ئەڤ تاوانە، نە ھەر بتنێ قڕکرنا ھەشت ھزار کەسان بوو، بەلکۆ تراژیدیایەکا مرۆڤی بوو، ب سێویکرن وبێ سەمیان ھیلانا ب دەھان ھزان زاڕۆکا بوو، چاڤەڕێکرن و ھەلاویستی ھێلانا ب ھزاران ژن و بووکێن نەڤەگوھاستی بوو. ددەمەکی دا کو ھەتا نوکە ئێش و ئازارێن وێ تاوانا مەزن بەردەوامن، لێ خۆڕاگری و سەبر و ھەدارا وان ژن و دایکان د وی ڕەوشا تراژیدی و مەترسیدار دا، ھەمبەر ھەموو فشارێن دەرۆنی و ئابۆری یێن ڕژێما بەعس، نموونەکا ئێکانە بوو د دیرۆکا مللەتێ کورد دا و جھێ شانازی و سەربلندیا وان شێرە ژنایە.
ئەگەر خۆڕاگریا پێشمەرگێ قەھرەمان و بەردەوامیا شۆڕه‌ش و بزاڤا ئازادیخوازیا گەلێ کوردستانێ نەبا، دا ناسنامە و مانا مللەتێ کورد، به‌رهه‌نگارى گەف و مەترسیێن مەزنتربن بن.
بڤێ ھەلکەفتنا خەمگێن و ل 40مین سالڤەگەڕا ڤێ چاما مەزن، ب ناڤێ لقێ ئێکێ پارتی دیموکراتی کوردستان، پرسە و سەرەخۆشیێن خۆ ئاراستەی کەس و کارێن شەھیدێن جنۆسایدا بارزانیان و سەرجەم شەھیدێن کوردستانێ دکەین و ڤێ تاوانا ڕویێ ڕاست و دروستێ ڕژێما بەعسا فاشی نیشا ھەموو دنیایێ دای، مەحکۆم و شەھمزاردکەین و داخوازێ ژ کۆمەلگەھا نیڤدەولەتی و حکۆمەتا عێراقا فدرال دکەین، دانپێدانێ ب جینۆسایدێن بارزانیان، ئەنفالان و کوردێن فەیلی ئێزدی بکەن.
پێدڤیە ل سەر حکۆمەتا عێراقا فدرال ژی، پێگیریێ ب بەرپرسیاریا خۆیا یاسایی و ئەخلاقی بکەت و داخازا لێبوورینێ ژ گەلێ کورد بکەت و کەس و کارێن شەھیدێن تاوانێن جینۆسایدێن کوردستانێ قەرەبوو بکەت.
ل دوماھیێ سەرێ ڕێز و نەوازشێ بۆ سەرجەم شەھیدێن ڕێیا ڕزگاریا گەلێ کوردستانێ دچەمینین، داخوازی ژ خودایێ دلۆڤان دکەین گیانێ ھەموو شەھیدان ب بھەشتا خۆ شاد و ئارام بکەت.
نەمری و سەرفەرازی بۆ شەھیدێن کوردستانێ. مرن و سەرشۆڕی ژی بۆ دوژمنێن کورد و کوردستانێ.
