کوالێتییا دەرمانان د بازارێن هەرێما کوردستانێ دا دێ هێته‌ بلند كرن و بهایێن وان ژی دێ داكه‌ڤن

ل ده‌ستپێكا دەست بکاربوونا کابینا نه‌هێ، ئێک ژ ئارمانجێن سەرەکی یێن مەسرور بارزانی سەرۆکێ حکومەتا هەرێما کوردستانێ، پێكهاتبوو ژ ئاسانکاریکرنێ بۆ هه‌موو وه‌لاتییان كو بگه‌هنه‌ باشترین خزمەتگوزاری یێن ساخله‌مییێ، پڕۆژێن چاکسازییێ د بیاڤێن دەرمانان دا دەستپێکر، رێڤەبەرێ کۆنترۆلا جۆری دبێژیت: ئه‌و پڕۆژە ب شێوەكێ باش هاتییه‌ بجهئینان و ل ده‌مه‌كێ نێزیك دا نابیت هیچ دەرمانه‌ك د بازاران دا ستیکەر پێڤە نەبیت و ب تەمامی دەرمان دێ هێنه‌ کۆنترۆل كرن.

یەکەیا هه‌ڤبه‌ستێن سەرەکی ل نڤێسینگه‌ها سەرۆک وەزیرێن هەرێما کوردستانێ ب پشته‌ڤانییا وەزارەتا ساخله‌مییێ ئیمزا کرنا هه‌ڤبه‌ستێن دەرمانێن کوالێتییا بلند ل گەل کۆمپانی یێن دەرمانان راگەهاندییە، بۆ دابینکرنا 156 جۆران ژ گرنگترین دەرمانان، بۆ کەرتێ ساخله‌مییێ ب گشتی ب بهایه‌كێ گونجایی و رکابەر ل گەل بهایێن بازاری.