برنج، سماق و ته‌حینا ئاكرێ بۆ ئورۆپا دهێنه‌ هنارتن

قه‌زایا ئاكرێ ب به‌رهه‌مێن ناڤخۆیى یا به‌رنیاسه‌، ئێك ژ به‌رهه‌مێن وێ یێن هه‌ره‌ باش سماقه‌، كو پێشبینى دهێته‌كرن ئه‌ڤ ساله‌ نێزیكى پێنج هزار ته‌نێن سماقێ بهێنه‌ به‌رهه‌مى، به‌رپرسێ راگه‌هاندنا رێڤه‌به‌رییا چاندنا ئاكرێ ژى دبێژیت : سماق، برنج و ته‌حینا ئاكرێ بۆ ئورۆپا دهێنه‌ هنارتن.

ئه‌ندازیار كاروان جه‌مال به‌رپرسێ راگه‌هاندنا رێڤه‌به‌رییا چاندنێ ل ئاكرێ ل دۆر به‌رهه‌مێ سماقێ بۆ ئاژانسا خانى دیاركر، ئاخا ئاكرێ گه‌له‌ك یا باشه‌ و بۆ چاندنێ گه‌له‌ك یا گۆنجاى یه‌، بۆ ئه‌ڤ ساله‌ ئه‌و پێشبینییا پێنج هزار ته‌نێن سماقێ دكه‌ن و گوت : ئه‌و سماقا دهێته‌ به‌رهه‌مئینان ب كوالیتییه‌كا باشه‌ و بۆ هه‌موو كوردستانێ دهێته‌ هنارتن و تێرا پێدڤییا ناڤخۆ دكه‌ت.

زێده‌تر ئاشكراكر، به‌رهه‌مێن ناڤخۆ یێن ئاكرێ وه‌كو برنج، سماق و ته‌حین ب رێكا كۆمپانییه‌كێ بۆ ئه‌لمانیا و دانیمارك و چه‌ند وه‌لاتێن دى یێن ئورۆپا دهێنه‌ هنارتن، حكومه‌تا هه‌رێما كوردستانێ ژى هه‌موو ئاسانكارییان دڤى بیاڤیدا دكه‌ت.

ئه‌ندازیار كاروان جه‌مالى ئاماژه‌ ب هندێ دا، ئه‌وان گه‌له‌ك پرۆژه‌ پێشكێشى حكومه‌تا هه‌رێما كوردستانێ كرینه‌، كو وان پلانێن دانا كارگه‌هێن دروستكرنا دوشاڤا ته‌مامێ، شیر و دروستكرنا ئالفێ گیانه‌وه‌ران داناینه‌ و ئه‌رد ژى بۆ دابینكرییه‌، حكومه‌تا هه‌رێمێ رازیبوون ل سه‌ر ڤان پرۆژه‌یان دایه‌ و ل هیڤییێ نه‌ وه‌به‌رهێنه‌ره‌ك بهێت و ده‌ست ب دروستكرنا وان كارگه‌هان بكه‌ت.