جاسم سەبری
بۆچی هوشیاریا تاکێ کورد نەگەهشتیە وی ڕادەی ل پرسێن خوە بگەرت، ئەرک و مافێن خوەیێن سروشتی بزانت یان خوە ناس بکەت یان بشێت سەرەدەرییەکا شارستانی دگەل وێ پێشڤەچوون و پێشکەفتنا نها بکەت، ئەڤا د چەرخێ وی دا روددەت؟
دبت ئەڤ پرسە پێدڤی ب لێکۆلینەکا هویر یا دیرۆکی و جڤاکی و ئابوری و سیاسی و پەروەردەیی و مرۆڤی بت، هەتا ئەم بگەهن وێ چەندێ کا بۆچی یان سەدەم چنە تا نها تاکێ کورد بگشتی هوشیاریەکا ساخلەم و دروست ل دەف پەیدانەبوویە، کا بۆچی پیڤەرێن تاکێ کورد دلاوازن و پتریاجارا بریار و لڤینێن تاکێ کورد نە ل ئاستێ پێدڤینە ل هەمبەر هەر روودانەک و بابەتەکێ گرێدایی ژیانا وی .
وەک من ل سەری ئاماژە ب هندێ دای دبت گەلەک ئەگەر هەبن، لێ ب دیتنا من ئەگەرێ هەری کاریگەر و ئەگەرێ سەرەکیێ ئەڤێ چەندێ ئەوە تاکێ کورد بۆ دەمەکێ کورت ب تنێ ژی وەک مرۆڤەکێ ژیانا وی مسوگەر نەژیایە و هەردەم تاکێ کورد ل هەمبەر دوو ئەزموون و ئالنگاریێن بهێز خەباتکریە.
یائێکێ: هەردەم تاکێ کورد د هەولا پاراستنا گیانێ خوەدایە، هەر ژ دەسپێکا ناساندنا خوە وەک کەسەکێ کورد زمان، راستی ئێرش و داگیر کرن و ئەنفال و قرکرن و ڕەڤ و گەفان بوویە و هەردەم گیانێ وی ژ لایێ دوژمنێن وی ڤە د مەترسیێ دا بوویە و پیەکێ وی د مال دا و پیەکێ وی دگوری دا بوویە .
یا دووێ: چ جاران تاکێ کورد ل گورەی پێدڤیێن ژیانا خوە ئارام نەبوویە و هەردەم بزاڤێن ب دەستخستنا نانێ ژیانا خوە کرینە و چ جاران ل ژێر سیستەمەکێ دروست یێ بەردەوامێ ژیانێ دەرباز نەبوویە هەم ل سەر دەمێ بندەستیێ تا قۆناغا دەستهەلاتا کوردی یا ڤێ دووماهیێ و پتریا تەمەنێ خوە و کەدا خوە بۆ ب دەستخستنا نانێ رۆژێ مەزاختیە و ئەودەم بۆ تاکێ کورد پەیدانەبوویە خاندن و زانین و پەروەردەییا خوە پێش بێخت و لگورەی وێ پێشکەفتنا ل سەردەمێ خوە پێنگاڤان باڤێژت، گۆتنەک جوان یا بیرمەند و نڤیسەرێ ئیتالی یێ ناڤدار میکیاڤیللی هەیە دبێژیت (ژبەرکو ئەز بهەژاری ژ دایک بووم، ژبەری ئەز فێری خوشگوزەرانیێ ببم ئەز فێری پێدڤیان بووم)، تاکێ کورد هەردەم ب هەژاری ژدایکبوویە و هەردەم ل شوپا پێدڤیان برێڤەچوویە و چ جاران د قۆناغەکا سیستەماتیک یا رێکخستی کو ژ ئابوور و ساخلەمی و پەروەردە و خواندن… هتد پشتراست بت و بوشاهیا هزرکرنێ بۆ پەیدابت .
دبت پشتی ئەڤا من ل سەری دای دیارکرن، ب شێوەیەکێ گشتی پرسەک بهێتە هەبوونێ، ئەرێ 31 سالێن سەربەستیێ و ل ژێر دەستهەلاتدارییا کوردی تێرا هندێ نەکرن هوشیاریەکا جڤاکی ل دەف تاکێ کورد پەیداببیت (نەخاسمی هندێ ئەڤ قۆناغە قۆناغەکا بەرهەمداربوویە بۆ کوردستانێ ب تایبەتی و جیهانێ بگشتی).
ئەڤ پرسیارە د بنەرەت دا پرسیارەکا سەقەتە و بەرسڤا وێ دیارە، چونکی ئەگەر تاکێ کورد د ڤێ قۆناغێ دا هوشیاریەکا جڤاکی و رەوشەنبیریەکا گشتی ل دەف پەیدا ببا ئەم نەدگەهشتینە ڤێ قوناغا نها یا مەترسیدار ئەڤا ئەم تێدا دژین، دامە تاکەکێ ساخلەم و ماموستایەکێ زانا و قوتابیەکێ ژێهاتی و ئەندازیارەکێ ئاڤاکەر و نوژدارەکێ بسپور و نساخەکێ هوشیار و بازرگانەکێ ب وژدان و دەنگدەرەکێ پاقژ و نڤیسەرەکێ بوێر و رۆژنامەڤانەکێ راستگۆ و دەستهەلاتدارەکێ خزمەتکار و سیستەمەکێ دادپەروەر و رەوشەنبیرەکێ رێنیشاندەر هتد … هەبن ، مخابن 31 سالێن تەمەنێ دەستهەلاتدارییا کوردیدا ئەم نەشیان سیستەمەکێ پەروەردەیی و رەوشەنبیری و هوشیاری لگورەی داب و نەریت و جڤاک و ئول و پێکڤەژیان و سروشتێ کوردی ئاڤا بکەن و تاکەکێ نشتیمانپەروەر و هوشیار و رەوشەنبیر و ساخلەم بینن هەبوونێ کو ل پرسێن خوە بگەرت کا ئایا من چ دڤێت؟ ئەرک و مافێن من چنە؟ ئەز بۆچی دژیم وچەوا بژیم؟ هەلبژارتنا دروست بۆ ژیانامن و پاشەرۆژا من وەک کەس بۆ مللەتێ من وەک نەتەوە و بۆ ساخلەمیا من وەک مرۆڤ کیشکە؟.
بێگومانە بابەت رێژەیی یە و د هەر بوارەکێ دا مە مرۆڤێن هوشیار و رێزان و شارەزا و دیار هەنە، لێ لگورەی قەبارە و کەرەستە و ئامرازێن بەردەست مە نەشیایە کۆمەلگەهەکا هوشیار ئاڤا بکەین.
