فه‌رمانگه‌ها میدیا و زانیارییان یا حكومه‌تا هه‌رێما كوردستانێ به‌لاڤكر، حكومه‌تا هه‌رێما كوردستانێ هه‌یڤانه 46 ملیار دیناران بۆ دابینكرنا ئاڤا ڤه‌خوارنێ بۆ وه‌لاتییان خه‌رج دكه‌ت، ب شێوه‌یه‌كێ گشتى رۆژانه دوو ملیۆن و 784 هزار و 606 میترێن سێجا یێن ئاڤا پاقژ دهێنه به‌رهه‌مئینان و دگه‌هنه وه‌لاتییان.
ئاماژه ب هندێ ژى دا، حكومه‌تا هه‌رێما كوردستانێ هه‌موو بزاڤ كرینه بۆ هندێ راده‌یێ پشتبه‌ستنێ ب سامانێ ئاڤا ل ژێر ئه‌ردى كێم بكه‌ت و ئاڤا ل سه‌ر ئه‌ردى ب تایبه‌تى ئاڤا ڕووباران بكه‌ته ژێده‌رێ ئێكێ یێ دابینكرنا ئاڤێ.
دیار ژى كر، بۆ ڤێ مه‌ره‌مێ وه‌زاره‌تا باژێرڤانى و گه‌شتوگوزارێ، 81 پرۆژه‌یێن ئاڤێ ل سه‌ر رووباران داناینه، ب رێكا وان پرۆژه‌یان رۆژانه ئاڤا پاقژ بۆ ئاكنجییێن باژێرێن مه‌زن و ده‌ڤه‌ران دابین دكه‌ت.
ل دۆر ئاڤا ل ژێر ئه‌ردى ئاشكراكر، ژ ئه‌نجامێ نه‌بوونا سیاسه‌تا بكارئینانا ئاڤێ ل رابردووى، پێنج هزار و 787 بیرێن ئاڤێ وه‌كو ژێده‌رێ دووێ یێ دابینكرنا ئاڤا ڤه‌خوارنێ دهاتنه بكارئینان، ئاڤا پشكه‌كا وان بیران كێمبوویه، حكومه‌تێ ستراتیجییه‌تا پشتبه‌ستن ل سه‌ر ئاڤا ل سه‌ر ئه‌ردى خسته دبوارێ بجهئینانێدا، داكو راده‌یێ پشتبه‌ستنێ ل سه‌ر وان ژێده‌ران كێم ببیت و پارێزگارى ل سامانێ ئاڤا ل ژێر ئه‌ردى بهێته‌كرن.
هه‌روه‌سا دیاركر، پرۆسه‌یا به‌رهه‌مئینان و به‌لاڤكرنا ئاڤێ و نووژه‌نكرنا تۆڕێن ئاڤێ و خه‌رجییێن سۆته‌مه‌نییێ بۆ ڤه‌گۆهاستنا ئاڤێ ل دووڤ خه‌ملاندنا وه‌زاره‌تێ، دگه‌هیته 46 ملیار دیناران.
ب كۆمكرنا سه‌رجه‌مێ خه‌رجى و مه‌زاختییێن به‌رهه‌مئینان و به‌لاڤكرنا ئاڤا ڤه‌خوارنێ بۆ هه‌موو ده‌ڤه‌رێن كوردستانێ، وه‌زاره‌تا باژێرڤانى و گه‌شتوگوزارێ ئه‌و داتایه ل به‌ر ده‌ستن، كو سالانه زێده‌تر ژ 550 ملیار دیناران ژلایێ كابینه‌یا نه‌هێ ڤه بۆ دابینكرنا ئاڤا پاقژ دهێنه خه‌رجكرن.
