سەرۆك بارزانی پەیامەك ل دۆر خوەنیشاندانێن كوردێن كەركووكێ بەلاڤكر و راگەهاند، ئەڤرۆ هێزێن ئەمنی یێن كەركووكێ توندوتیژی بەرامبەر گەنجێن كوردان بكارئینایە و خوینا وان رێتییە، ئەڤ سەرەدەرییا هێزێن ئەمنی یێن كەركووكێ ب هیچ رەنگەكی ناهێتە قەبوولكرن و دێ دەرئەنجامێن خراب هەبیت
دەقێ پەیاما سەرۆك بارزانی
ب ناڤێ خودێ مەزن و دلۆڤان
ل دۆر رەوشا كەركووكێ بۆ دەمێ چەند رۆژانە كۆمەكا ڕێگر و تێكدەران ب بەهانەیا ڕێگریكرن ژ ڤەكرنا بارەگایێن پارتی دیموكراتی كوردستان ل باژێرێ كەركووكێ، ڕێكا هەولێر و كەركووكێ گرتینە و ڕێكێ نادەن وەلاتی ژیان و هاتنوچوونا ئاسایی یا خوە بكەن و رەوشەكا زۆر نە لبار و پڕمەترسی بۆ خەڵكێ كەركووكێ دروست كرییە.
مە هەردەم ئەو چەندە دووپات كریە كو كەركووك دڤێت نموونەیا پێكڤەژیان و برایەتی و تەبایی یا د ناڤبەرا پێكهاتەیێن ئەوی باژێری بیت، لێ ئەڤان ڕەفتارێن نە هەژی و نە یاسایی، بزاڤەكە بۆ دروستكرنا فیتنێ و تێكدانا پێكڤەژیانێ. جهێ مەندەهۆشییەكا مەزنە كو د چەند رۆژێن بۆریدا هێزێن ئەمنی و پۆلیسێن كەركووكێ ب هیچ رەنگەكی ڕێگری ل وان تێكدان و ڕەفتارێن نە یاسایی یێن ڕێگران نەكرییە، لێ ئەڤرۆ ل هەمبەری گەنج و خۆنێشاندەرێن كوردێن كەركووكێ هێز و توندوتیژی بكار هاتییە و خوێنا گەنجێن كورد هاتییە رێژتن. ئەڤ جۆرێ سەرەدەرییێ ب هیچ رەنگەكی جهێ قبووڵكرنێ نینە و دێ ئەنجامێن زۆر خراپ ژێ پەیدا بیت و، ڕێژتنا خوێنا گەنجێن مە ل كەركووكێ دێ باجەكا گران هەبیت.
ل ڤێرێ داخوازێ ل بەڕێز سەرۆكوەزیرێن عیراقا فیدڕاڵ دكەم كو سنوورەكی بۆ ڤان ڕێگر و تێكدەران دانن و دووماهییێ ب وێ ستەم و جوداكاری و ڕێگرییێ بینن كو ڕاستەوخۆ پێكڤەژیان و سەقامگیرییا كەركووكێ و دەڤەرێن دی دكەتە ئامانج.
مەسعود بارزانی
2ی ئەیلوولا 2023
