ئه‌ڤ ساله‌ برنجێ كوردی و سماق دێ بۆ بازارێن جیھانی هێنه ره‌وانه‌‌ كرن

ئاژانسا خانی:

ئەڤ ساله‌ ژی بەرھەمێن ناڤخۆیی یێن جۆتیارێن ھەرێما کوردستانێ دێ ڕەوانەیی بازارێن ئورۆپا هێنه‌ كرن، ئه‌ڤ چه‌نده‌ دێ بیته‌ ئه‌گه‌ر كو بازاره‌كێ باش بۆ ساخكرنا به‌رهه‌مێن جۆتیاران په‌یدا ببیت.

ئەحمەد جەمیل، رێڤەبەرێ گشتییێ چاندنێ ل دھۆکێ” زێده‌تر دیار كر: ئه‌ڤ ساله‌ بەرھەمێ ناڤخۆیی یێ جۆتیارێن ھەرێما کوردستانێ دێ ڕەوانەیی بازارێن جیھانی هێنه‌ كرن، ل ڤان رۆژان دێ ٣٠ ته‌نێن برنجێ ئاکرێ و چەندین ته‌نێن سماقێ ڕەوانەیی بازارێن ئورۆپا هێنه‌ كرن و نوكه‌ خواسته‌كا زۆر ل سەر برنجێ كوردی ھەیە، ئه‌م ژی ب هه‌موو ره‌نگان دێ هاریكارییا جۆتیاران كه‌ین.

ناڤهاتی گۆت ژی: سیاسەتا حکومەتا ھەرێمێ و ب تایبەتی سەرۆکێ حکومەتێ ئەوە كو پتر گرنگی ب کەرتێ چاندنێ بهێته‌ دان، حکومەت ژی پشته‌ڤانا جۆتیارانه‌ بۆ هندێ بازار بۆ به‌رهه‌مێن وان په‌یدا ببیت” هه‌روه‌سا به‌ری چەند ڕۆژان ٢٥٠ ته‌نێن مازییان هاتنه‌ هنارتن بۆ وه‌لاتێ تورکیا و ل ڤان رۆژان ژی دێ برنج و سماق هێنه‌ هنارتن.