ئاژانسا خانی:
وه‌سا بریاره هه‌ردو وه‌زیرێن دارایى و ئابوورى یێن هه‌رێما كوردستانێ و عیراقێ ل په‌رله‌مانێ عیراقی ئاماده بن و به‌هرا هه‌رێمێ ل گه‌ل لژنا دارایى یا په‌رله‌مانێ عیراقێ به‌حس كه‌ن.
چیایی ته‌یمۆر عه‌بدال” ئه‌ندامێ په‌رله‌مانێ عیراقێ ل سه‌ر لیستا پارتی دیموكراتی كوردستان” بۆ ئاژانسا خانی دیار كر: ل حه‌فتیا بوری ل سه‌ر داخوازا هنده‌ك په‌رله‌مانتارێن كورد ده‌مه‌ك هاتبوو دیار كرن” كو هه‌ردو وه‌زیرێن دارایی یێن هه‌رێمێ و عیراقێ ل په‌رله‌مانێ عیراقێ ل گه‌ل لژنا دارایی یا په‌رله‌مانی ئاماده بن و دانوستاندنێ ل سه‌ر چه‌ندین بابه‌تێن گرێدایی دناڤبه‌را هه‌رێمێ و عێراقێ دا بكه‌ن” به‌لێ ئه‌و كۆمبوونه هاته پاشخستن و هه‌تا نوكه چ ژڤان بۆ ئاماده‌بوونا وان هه‌ردو وه‌زیران نه‌هاتییه دیار كرن” هیشتا یا دیار نینه” كانێ كه‌نگی دێ ده‌مه‌ك ژ لایێ په‌رله‌مانی ڤه بۆ وێ كۆمبوونێ هێته دیار كرن.
ناڤهاتی گۆت ژی: لژنا دارایى یا په‌رله‌مانێ عیراقێ دێ میڤاندارییا ئاوات شێخ جه‌ناب، وه‌زیرێ دارایى یێ حكومه‌تا هه‌رێما كوردستانێ و ته‌یف سامى، وه‌زیرا دارایى یا عیراقێ كه‌ت و بابه‌تێ به‌هرا هه‌رێمێ ژ بودجێ عیراقێ و ناكۆكییێن ل سه‌ر بودجه‌یى د ناڤبه‌را هه‌ولێر و به‌غدا دێ مژارا سه‌ره‌كى یا وێ كۆمبوونێ بیت” هه‌روه‌سا حكومه‌تا عیراقێ دبێژیت” ئه‌ڤ ساله مه هه‌شت ترلیۆن دینار یێن راده‌ستی هه‌رێمێ كرین و ئه‌ڤ ژماره یا دروست نینه” چونكی ب تنێ وان دو ترلیۆن و 496 ملیار دینار یێن داینه هه‌رێمێ” ژ وان ژی 400 ملیار دینار یێن سالا بوری بووینه” دیسان حكومه‌تا عیراقێ” وان سێ هه‌یڤێن حكومه‌تا هه‌رێمێ نه‌فت فرۆتی ل سه‌رهه‌رێمێ حسێب دكه‌ن” به‌ری كو بریارا راگرتنا نه‌فتێ بهێته دان” هه‌روه‌سا ده‌ینێن بانكا بازرگانییا عیراقی ل سه‌ر حكومه‌تا هه‌رێمێ حسێب دكه‌ن” له‌وما ب هاتنا هه‌ردو وه‌زیران ئه‌و بابه‌ته دێ بۆ هه‌موو ئالییان هێته دیار كرن و روونكرن.
