وه‌زاره‌تا په‌روه‌ردێ بریاره‌ك ده‌رباره‌ى ترۆمبێلێن ڤه‌گۆهاستنا قوتابییان ده‌ركر

وه‌زاره‌تا په‌روه‌ردێ یا حكومه‌تا هه‌رێما كوردستانێ راگه‌هاند، شۆفێرێن پاس و ته‌كسییان یێن كارێ ڤه‌گۆهاستنا زارۆكێن باخچه‌ و قوتابییان دكه‌ن، دڤێت سالنامه‌یا ترۆمبێلێ، موله‌تا شوفیرییێ ( كارتا زانیارییان یان نیشتیمانى ) پێشكێشى كارگێرییا ناڤه‌ندێن خواندنێ بكه‌ن، هه‌روه‌سا ئاماژه‌ ب هندێ دا، هه‌ر ره‌فتاره‌كا دوور ژ ره‌وشتێ بلند و دابونه‌ریتێن جڤاكى به‌رامبه‌ر هه‌ر قوتابییه‌كى بهێته‌كرن، ژبلى سه‌میانێن وان، وه‌زاره‌تا په‌روه‌ردێ ژى دێ سكالایێ تۆماركه‌ت.

وه‌زاره‌تا په‌روه‌رده‌یا حكومه‌تا هه‌رێما كوردستانێ بریاره‌ك ده‌ركر و ریڤه‌به‌رایه‌تییێن هه‌موو په‌روه‌رده‌یێن هه‌رێما كوردستانێ ئاگه‌هداركرن، پێدڤییه‌ بۆ ڤه‌گۆهاستنا قوتابییان ب پاس و ته‌كسییان ئه‌ڤ خاله‌ بهێنه‌ په‌یره‌وكرن.

ئێك : شۆفێرێن پاس و ته‌كسییان یێن كارێ ڤه‌گۆهاستنا زارۆكێن باچخه‌ و قوتابخانه‌یان دكه‌ن، موله‌تا شۆفێرییێ ( كارتا زانیارییان یان نیشتیمانى ) پێشكێشى كارگێرییا ناڤه‌ندێن خواندنێ بكه‌ن.

دوو : رێڤه‌به‌رێن ناڤه‌ندێن خواندنێ دڤێت تماما دۆكۆمینت و زانیارییێن ل خالا ئێكێ به‌حسا وان هاتییه‌ كرن، بده‌نه‌ بنگه‌هێن پۆلیسێن سنۆرێن خوه‌.

سێ : هه‌ر شۆفێره‌كێ پابه‌ندى رێنمایێن رێڤه‌به‌رییا هاتنوچوونێ نه‌بیت و سكالا ل سه‌ر هاته‌ تۆماركرن، پشتى دیاربوونا راستییان، پێدڤییه‌ رێڤه‌به‌رێ گشتییێ په‌روه‌ردیێن ( پارێزگه‌هـ و ئیداره‌یێن سه‌ربه‌خۆ ) داخواز ژ لژنه‌یا قائیممقامییێ بكه‌ن كو رێك ب شۆفێرى بهێته‌دان كارێ ڤه‌گۆهاستنا قوتابییان بكه‌ت.

چار : پێدڤییه‌ شۆفێر پابه‌ندى رێنمایێن هاتنوچوونێ بیت، ب تایبه‌تى نابیت رێ ب قوتابییان بده‌ت كو ده‌ستێن خوه‌ ژ جامێن ترۆمبیلێ ده‌ربێخین، نابیت ده‌نگێ مسه‌جلا ترۆمبێلێ یێ بلند بیت، نابیت ره‌فتار و په‌یامێن نه‌په‌روه‌رده‌یى و نه‌گونجاى هه‌بن، پێدڤییه‌ شۆفێر پابه‌ندى له‌زاتییا قانوونى ل سه‌ر جاده‌یان بیت، ژبه‌ركو دڤێت ل هه‌موو ده‌مان بزانن كو ڤه‌گۆهاستنا قوتابییان به‌رپرسیاره‌تییه‌كا هه‌ستیاره‌ و سه‌میانێن وان دگه‌لدا نینن. 

پێنج : هه‌ر ره‌فتاره‌كا دوور ژ ره‌وشتێ بلند و دابونه‌ریتێن جڤاكى به‌رامبه‌ر هه‌ر قوتابییه‌كى بهێته‌كرن، ژبلى سه‌میانێن وان، وه‌زاره‌تا په‌روه‌ردێ ژى دێ سكالایێ تۆماركه‌ت.

شه‌ش : نابیت شۆفێر بارگرانییێ ل سه‌ر مالباتێن قوتابییان دروست بكه‌ن، ئه‌گه‌ر كارگێرییێن ناڤه‌ندێن خواندنێ داخواز ژێ كر كوژمه‌كێ پاره‌ى بده‌نه‌ ناڤه‌ندێن خواندنێ.

حه‌فت : هه‌ر شۆفێره‌كێ زێده‌تر ژ ژمارا رێپێداى قوتابییان ب ڤه‌گۆهێزیت، دێ رێكارێن پێدڤى به‌رامبه‌ر سه‌رپێچكاران هێنه‌ وه‌رگرتن.

هه‌شت : ل ده‌مێ تۆماركرنا سكالایان نامه‌ ب رێكا وه‌تسئاپ و ڤایبه‌رى بۆ ژۆرا سكالایێن ئه‌لكترۆنى یێن وه‌زاره‌تا په‌روه‌ردێ ب ڤان ژماره‌یان (07505103232) و (07505106262) بهێنه‌ هنارتن.