ب هەلكەفتا شێستەمین سالڤەگەرا دامەزراندنا ئێزگێ دەنگێ كوردستان مەسرور بارزانی، سەرۆكێ حكومەتا هەرێمێ پەیامەكا پیرۆزباهییێ بەلاڤكر. دەقێ پەیاما مەسرور بارزانی: بەڕێزان ڕێڤەبەر و ستافێ بڕێڤەبرن و كارمەندێن ئێزگێ دەنگێ كوردستان، ب هەلكەفتا شێستەمین سالڤەگەرا دامەزراندنا ئێزگێ دەنگێ كوردستان، گەرمترین پیرۆزباهییان ئاراستەی هەوە دكەم و هیڤییا سەركەفتنێ و بەردەوامییێ بۆ هەوە دخوازم.
ئێزگێ دەنگێ كوردستان، دیرۆكەكا دویر و درێژ و پڕ ژ شانازی و سەروەری د داكۆكیكرنێ ل مافێن ڕەوا یێن گەلێ كوردستانێ دا هەیە و دەنگێ ڕەسەن و ڕاستەقینە و سەكۆیەكێ ڕاستگۆ و زەلال یێ شوڕەش و پێشمەرگێن قارەمان و خەلكێ كوردستانێ و سەرجەم ئازادیخوازان بوویە. قۆتابخانەیەك ژی بوویە بۆ پێگەهاندنا دەهان ڕاگەهاندكار و كادر و سەركردێن وێرەك.
د ڤێ هەلكەفتێ دا، ب ڕێز و پێزانین ڤە یادا وان هەموو خەباتكار و تێكۆشەران دكەین یێن كو د قۆناغێن جوداجودا یێن ڤێ سەكۆیێ دا خزمەت كرین، دەستخۆشییێ لێ دكەم و هیڤییا پێشكەفتنێن زێدەتر بۆ دخوازم.
