ل دویڤ یاسایەكا نوی یا دەزگەهێ كۆچا سویدێ كو ژ ڕۆژا 1/11/2023 كار دێ پێ هێتەكرن، مافێ ئاكنجیبوونێ د وی وەلاتی دا بتنێ دێ ب وان كەسان هێتەدان یێن كو داهاتێ وان د هەیڤەكێ دا زێدەتری 27 هزار و 360 كڕۆنان بیت، كو دبنە نێزیكی دوو هزار و 500 دۆلارێن ئەمریكی.
ئەڤ یاسایا نوی یا سویدێ د دەمەكی دایە كو پێشتر هەر كەسەكێ دەرڤەی ئێكەتییا ئەۆڕوپا بۆ وەرگرتنا مافێ ئاكنجیبوونا كاری ل سوید بتنێ پێدڤی ب 13 هزار كڕۆنێن هەیڤانە هەبوو، كو دبنە نێزیكی ئێك هزار و 200 دۆلارێن ئەمریكی.
ئەڤەژی ددەمەكی دایە پتریا پیشەیێن پەنابەران ل سویدێ داهاتێ وان ژ وێ بڕا پارەی كێمترە كو دەزگەهێ كۆچا سویدێ دانای، ب تایبەتی كار و پیشەیێن وەكو چاڤدێرییا دانعەمران، كاركرن ل خوارنگەهـ و ئۆتێلان.
ڕادیۆیا سوید ژی بەلاڤكریە، دهێتە چاڤەڕێكرن د ڤێ هەیڤێ دا ب سەدان پەنابەرێن دی كو ب ڕێیا كاركرنێ مافێ ئاكنجیبوونێ ل سویدێ پێ هاتییەدان بهێنە نەچاركرن وی وەلاتی بجهـبهێلن و بۆ وەلاتێن وان بهێنە دیپۆڕتكرن.
جهێ گۆتنێ یە د چەند حەفتییێن بووری دا سەدان پەنابەر ب ئەگەرێ وەرنەگرتنا مافێ پەنابەرییێ ل وی وەلاتی ب زۆڕی بۆ وەلاتێن وان هاتینە دیپۆڕتكرن.
