گه‌فه‌كا مه‌زن یا ئه‌مریكا ل عیراقێ هاته‌ ئاشكراكرن

محه‌مه‌د شیاع سوودانى سه‌رۆكوه‌زیرێن عیراقێ پشتى ژ ته‌هرانێ ڤه‌گه‌ریایى، كۆمبوونه‌كا بله‌ز دگه‌ل سه‌ركرده‌یێن چارچووڤێ هه‌ماهه‌نگییێ كر و د كۆمبوونێدا په‌یام و هۆشدارییێن ئه‌نتۆنى بلینكن وه‌زیرێ ده‌رڤه‌ یێ ئه‌مریكا ب لایه‌نێن شیعه‌یان گه‌هاندن.

ل دووڤ ڕاپۆرته‌كا ( العربي الجدید )، سوودانى و سه‌ركرده‌یێن چارچووڤێ هه‌ماهه‌نگییێ دكۆمبوونێدا دووپاتى ل هندێ كر، ژ ئه‌نجامێ به‌رده‌وامبوونا هێرشان بۆ سه‌ر بنگه‌هێن سه‌ربازییێن ئه‌مریكا و كارڤه‌دانێن وى وه‌لاتى، دێ مه‌ترسى ل سه‌ر عیراقێ هه‌بن.

به‌حس ل هندێ ژى كر، سوودانى دووپاتى ل ڕژدییا واشنتۆنێ دجهئینانا گه‌فاندا و هێرشكرنا سه‌ر وان گرۆپان كر، یێن هێرشى بنگه‌هێن ئه‌مریكا ل ده‌ڤه‌رێ دكه‌ن.

ل دووڤ هه‌مان ڕاپۆرت، سوودانى داخواز ژ سه‌ركرده‌یێن چارچووڤێ هه‌ماهه‌نگییێ كر، ڕۆلى د كێمكرنا ئالۆزییاندا بگێرن و رێگرییێ ل هێرشێن گرۆپێن چه‌كدار بۆ سه‌ر بنگه‌هێن سه‌ربازییێن ئه‌مریكا بكه‌ن.