پێنج هزار دینار دێ ژ کرێیا پاسان بۆ هاتن و چوونا قوتابیان هێنە کێمکرن

بەراورد ب سالا بووری بۆ هەر هەیڤەکێ دێ پێنج هزار دینار ژ کرێیا پاسان بۆ قوتابیان هێنە کێمکرن و ئێدی نابیت چ پاس قوتابیێن زێدەتر ژ ژمارەیا کورسیکێن پاسێ دگەل خۆ هەلگرن.

عەلی حەسەن، بەرپرسێ لقا دهۆک یا ئێکەتیا قوتابییێن کوردستانێ بۆ ئاژانسا خانی گۆت:”ئەڤرۆ 8 چریا دووێ 2023، ب سه‌رپه‌رشتیا ماجد سه‌ید سالح، جێگرێ پارێزگارێ دهۆكێ و ب ئاماده‌بوونا ئیسماعیل موحه‌مه‌د، قایمقامێ قەزا دهۆكێ ب وه‌كاله‌ت و نوونه‌رێن سازیێن ئه‌منی و ئێكه‌تیا قوتابیان لدوور كێمرنا بوهایێن ترۆمبێلێن هاتن وچوونا قوتابیان ل هه‌موو قوتابخانێن په‌روه‌ردا گشتی یا دهۆكێ كۆمبوونه‌ك هاته‌ ئه‌نجامدان.”

بەرپرسێ لقا دهۆک یا ئێکەتیا قوتابییێن کوردستانێ گوتژی:” د ناڤەرۆکا کۆمبوونا دا چەندین پێشنیار هاتە کرن، ئێک ژ وان پێشنیاران ژی ئەو بوو کو بوهایێ پاسان بۆ قوتابیان بهێتە کێمکرن و بەراورد ب سالا بووری هەر قوتابیەک پێنج هزار دیناران کێمتر بدەتە کرێیا هەیڤانە یا پاسان.”

دیارکر ژی:”بەراورد ب سالا بووری بۆ هەر قوتابیەکی دێ بوهایێ چار ڕۆژان هێتە کێمکرن، ئانکو دێ پێنج هزار دیناران کێمتر دەن، لێ ئەگەر هات و د هەیڤەکێ دا رؤژێن بهێنڤەدانێ ژ چار ڕۆژان زێدەتر بوون، ل وی دەمی پێدڤیە خودانێ پاسێ لدووڤ رۆژێن بهێنڤەدانێ ڕێژەیا کرێیا پاسێ بۆ قوتابیان کێم بکەت.”

هەر وەسا عەلی حەسەن گۆتژی:”ئێک ژ خالێن دی یێن گرنگ یێن کۆمبوونێ ئەو بوو کو ئێدی نابیت چ پاس (کوستەر یان مینی پاس) ب چ رەنگان قوتابیێن زێدە دگەل خۆ ڕاکەن، ئانکو ژمار کورسیکێن پاسان چەندە پێدڤیە هند قوتابی د پاسێ دا بن، هەر وەسا پێدڤە قوتابی و خودانێن پاسان پێگیریێ ب دەمی بکەن و د دەمێ خۆ یێ دروست دا ئامادە ببن.”