د. خەلیل غازی دۆسکی: کۆمەکا بریار و رێکارێن نوو بۆ مامەلەکرنا بانکێن ناڤخۆ ل گەل سیتسەمێ دراڤێ نێڤدەولەتی هاتینە دەرکرن

ئاژانسا خانی:

د. خەلیل غازی دۆسکی، ئەندامێ لژنا دارایی ل پەرلەمانێ عیراقێ، بۆ ئاژانسا خانی دیار کر: ل رۆژێن بورى، ل (ئه‌بوزه‌بی) كۆمبوونێن به‌رفره‌ھ هاتینه‌كرن دناڤبه‌را شاندێ بانكا ناڤه‌ندییا عیراقى و لایه‌نێ ئه‌مریكى یێ به‌رپرس ل سه‌ر كریارێن ڤه‌گوهاستنێن ده‌رڤه‌ بۆ دیاركرنا داهاتان، ژ ڤه‌رێژا ئه‌ڤان دانوستاندنان كۆمه‌كا بریار و رێكارێن نوو هاتینه‌ ده‌ركرن، کو د هاریكاربوون بۆ ئاسانكرنا ئه‌وان رێكارێن تایبه‌ت دا ب ڤه‌گوهاستنا ده‌ره‌كى یێن گرێدایى ب داهاتى ڤه‌، ب رێكا فرۆتنا دراڤێ بیانى و تێدا رێكکه‌فتن ل سه‌ر چەندین خالێن دیاركرى هاتییه‌ كرن.

ناڤهاتی گۆت ژی، رێكکه‌فتن ل سه‌ر دانانا بالانسه‌كێ پێشوه‌خت بۆ پێنچ بانكێن عیراقى د هژمارێن وان دا ب رێكا دۆلارى ل ده‌ف بانكێن ئوردنى و ب رێكا jp morgan هاته‌ كرن، هەروەسا رێكکه‌فتن هاته‌كرن ل سه‌ر  هه‌ر ئاریشه‌كا گرێدایى ب (حه‌والاتێن) ره‌تكرى ڤه‌ و كو ره‌تكرنا ئه‌ڤان (حه‌والاتان) پێدڤییه‌ بهێته‌ پشست به‌ستن ب چه‌ند ئه‌گه‌ره‌كێن بهێزڤه‌، چه‌ندین كۆمبوونێن دى هاتینه‌كرن دناڤبه‌را ئێك ژ بانكێن ئیماراتى و بانكا ناڤه‌ندا عیراقى دا و به‌رهه‌ڤبوونا لایه‌نێ ئه‌مریكى ب مه‌ره‌ما جێبه‌جێكرنا رێكارێن باشكرنا بالانسى ب رێكا ده‌رهه‌مێ ئیماراتى (UAE Dirham) بۆ بانكێن عیراقى.

هەروەسا گۆت ژی، ئەو كاروباره‌ ب شێوه‌كێ جوان ب رێڤه‌دچن و هه‌مى رێكارێن هونه‌رى گرێدایى بابه‌تى ڤه‌ هاتینه‌ ئێكلاكرن، پێشبینى دهێته‌كرن كو رێكارێن بكاركرنا بالانسی ب رێكا ده‌رهه‌مێ ئیماراتى ده‌سپێبكه‌ت ل رۆژێن بهێن، هەروەسا دانوستاندن ب رژدى گه‌هشتینه‌ قووناغێن دووماهییێ بۆ بكاركرنا بالانسێ هنده‌ك بانكێن عیراقى ب رێكا (یۆرۆ) ژلایێ بانكا یوباف (UBAF) بۆ پاره‌دانا بازرگانییێ ل گه‌ل ئێكه‌تیا ئورۆپى، ب هه‌مان رێكار هژمارا بانكان هاته‌ زێده‌كرن ئه‌وێن كو ب رێكا وان بالانسێن وا بهێنه‌ بكارخستن ب رێكا (یوانێ چینى) ب رێكا بانكا گه‌شه‌پێدانا (سه‌نگافورى)، هژمار بۆ شه‌ش بانكێن عیراقى ل ڤێ بانكێ هاتنه‌ ڤه‌كرن و د ماوێ داهاتى دا دێ حه‌فت بانكێن دى ژى هێنه‌ زێده‌كرن بۆ پاره‌دانا بازرگانى و داهاتیێن عیراقى ژ چینێ و سالانە ئه‌و داهاتى دبنه‌ نێزیكى (12) ملیار دۆلار.

د. خەلیلی گۆت ژی، ده‌ستپێكه‌ك هاتییه‌دان بۆ ڤه‌كرنا هژمارێن بانكى ب رێكا (روبیێ هندستانى) بۆ هژماره‌كا بانكێن عیراقى ب رێكا هه‌مان ژێده‌ر ئه‌و ژى بانكا گه‌شه‌پێدانا (سنگافورى)، لقێ (نیوده‌لهى) وه‌ك، د قووناغه‌كا ده‌ستپێكێ دا رێكارێن بالانسكرنێ ب دو بانكێن عیراقى هاتییه‌دان و پێشبینى دهێـته‌كرن كو ئه‌ف رێكاره‌ دهاریكاربن دپاره‌دانا داهاتێن عیراقێ ژ هندستانێ و تایبه‌تى ده‌رمان و كه‌رەستێن خوارنێ كو دبیته‌ نێزیكى (3) ملیار دۆلاران.