ئاژانسا خانی:
د. خه‌لیل غازی دۆسكی” ئه‌ندامێ لژنا دارایی ل په‌رله‌مانێ عێراقێ” بۆ ئاژانسا خانی دیار كر: بازرگانییا ( زێری و ترۆمبێل و مۆبایل و جگاران) ب نێزیكترین ده‌م ب دراڤێ دۆلارى و ب بهایێ فەرمی دێ سه‌رده‌رى ل گه‌ل هێته كرن “ئه‌ڤ پێنگاڤه دێ بیته فاكته‌ره‌كێ هه‌ره گرنگ و هاریكار بۆ ئینانا ئه‌وان كه‌ل و په‌لان و ئه‌وێن كارێ كرین و ڤه‌گوهاستنا دۆلارى دكه‌ن ب رێیا بانکا ناڤه‌ندی ب دۆلارى.
ناڤهاتی گۆت ژی: لدووڤ راسپاردێن محه‌مه‌د شیاع سوودانی” سه‌رۆك وه‌زیرێن عیراقێ یێن تایبه‌ت ب رێكخستنا بازرگانى و كریارێن ئینانا چه‌ندین كه‌ل و په‌لان ئه‌وێن پترییا وان پارێ وان ژ بازارێ دەرڤەیی سیستەمی ئانکو ب بهایێ سیکێ دهێت و ئه‌و كارتێكرنێن خراب ئه‌وێن لدووڤ دا دهێن ل سه‌ر سه‌قامگیرییا بهایێن مه‌زاختنێ، جڤاتا وه‌زاره‌تا ئابوورى دێ چاڤخشاندنه‌كێ ل دور وی بابه‌تى كه‌ت كو پێشنییاركرنا چه‌ندین بریارێن گرنگ بخوه‌ڤه دگریت بۆ ب ساناهیكرن و برێڤه‌برنا كارۆبارێن هاتنا ئینانا كه‌ل و په‌لێن (زێرى، ترۆمبێل، مۆبایل و جگاران) بۆ مینبه‌را ڤه‌گوهاستنێن دارایى یێن ده‌رڤە.
د. خه‌لیلی گۆت ژى: ئه‌و بریار و راسپارده دێ وه‌ك فاكته‌ره‌كى د هاریكاربن داكو بازرگانێن ئه‌وان كه‌ل و په‌لان كارێ كرین و ڤه‌گوهاستنا دۆلارى ژ بازارێ دەرڤەیی سیستەمێ بانکا ناڤەندی” دۆلارى به‌ره‌ف مینبه‌را تایبه‌ت ببه‌ن” یان فرۆتنا دراڤێ بیانى دناڤا بانكا ناڤه‌ندى یا عیراقێ دا و ب بهایێ فه‌رمى بازارێ خۆ ئەنجام بدەن” دهێته چارڤه‌رێكرن كو ئه‌ڤ پێنگاڤه فاکتەره‌كێ هه‌ره باش بیت بۆ كێمكرنا بهایێ دۆلارى د بازارێن ناڤخویی دا” چونكی بازرگانى ب ئه‌وان كه‌ل و په‌لێن مه ئاماژه پێكرى ب رێژه‌کا بلند ئەگەرێن بلند بوونا بهایێ دولاری بوون.
