بەرپرسێ بەشێ یاسایی یی دەزگەهێ هەلبژارتنێن پارتی دیموکراتی کوردستان گۆتژی:”دەربارەی ب رێڤەچوونا هەلبژارتنێن پەرلەمانێ کوردستانێ پشتی دەستنیشانکرنا ڕۆژا 25 شوباتا 2024، وەکو رۆژا ب رێڤەچوونا هەلبژارتنێن پەرلەمانێ هەرێمێ ژ لایێ سەرۆکایەتیا هەرێما کوردستانێ ڤە، هەمی ئامادەکاری ژ رووی هونەری و کەتواری ڤە هاتینە کرن و چ ئەگەر و ئاریشەیەک بۆ نە ئەنجامدانا هەلبژارتنان نیە.”
ئاماژە کر ژی،”پارتی دیموکراتی کوردستان ل سەر پرسا ئێک ژ سکالایێن ئێکەتیا نیشتیمانی ل سەر شێوازێ ب ڕێڤەچوونا هەلبژارتنێن پەرلەمانێ کوردستانێ و پرسا دابەشکرنا کورسییێن پێکهاتەیان چاڤەرێی بڕیارا دادگەها فیدڕالی یا عیراقێ یە، ئەگەر هاتوو دادگەها ناڤهاتی بڕیارەکا دروست و دوور ژبەرژەوەندییێن نەتەوەی و نیشتیمانی دا دەرخست و چ ڕێگری دروست نەکرن هەلبژارتن دێ د دەمێ خۆ دا هێنە کرن ئێدی چ ئاریشە و بەربەست بۆ نە کرنا هەلبژارتنان نا مینن.”
دیارکر ژی،” ل گۆرەی دەستووری چ خالەک نینە کو بۆ سکالایا ئێکەتیا نیشتیمانی یا کوردستانێ ببیتە بهانە بۆ پاشخستن یان نە کرنا هەلبژارتنان و پێدڤی د ڕوونشتنا ئێکێ دا دادگەها بلندا یا فیدڕالی بڕیارا هەلوەشاندنا ئەوێ سکالایێ دابا.”
هاوار محەمەد گۆت:”پێدڤیە هەلبژارتنێن پەرلەمانێ هەرێما کوردستانێ د دەمێ خۆ یێ دیاکری دا بهێنە کرن، چوونکە د نوکە دا زێدەتری هەر دەمەکی هەرێما کوردستانێ د ڕەوشەکا خراب دایە ژ بەر نەبوونا دەستهەلاتا یاسا دانانێ و هەمی لایەنێن سیاسی یێن هەرێمێ ژی هەست ب ئەڤێ مەترسیێ دکەن، لەورا داخواز ژ هەمی لایەنێن سیاسی یێن هەرێما کوردستانێ دکەین، ژ پێخەمەت بڕێڤيچوونا هەلبژارتنێن پەرلەمانێ کوردستانێ و بەرژەوەندیێن نیشتیمانی د ئێکرێزبن و هەست ب بەرپرسیارەتیێ بکە.”
دهێتە زانین، پشتی دوو ڕوونشتنێن پەرلەمانێ عیراقێ ل دوور ڕاستڤەکرنا یاسایا کۆمسیۆنا هەلبژارتنێن عیراقێ، ئەڤرۆ رۆژا چارشەمبی جڤاتا نوونەرێن عیراقێ د ڕوونشتنەکا نە ئاسایی دا ب زۆرینەیا دەنگێن ئەندامێن جڤاتا نوونەرێن عیراقێ، ژیێ کۆمسیۆنا بلند یا هەلبژارتنێن عیراقێ بۆ دەمێ شەش هەیڤێێن دی درێژ کر و ب ئەڤی ڕەنگی کۆمسیۆنا بلند یا هەلبژارتنێن عیراقێ دێ شێت سەرپەرشتیا ب ڕێڤەبرنا هەلبژارتنێن پەرلەمانێ کوردستانێ کەت، کو پێشتر سەرۆکایەتیا هەرێما کوردستانێ ڕۆژا 25 شوباتا 2024، وەکو دەمێ ب ڕێڤەچوونا هەلبژارتنێن پەرلەمانێ هەرێمێ دەستنیشاکر بوو و کۆمسیۆنا بلندا هەلبژارتنێن عیراقێ بۆ مەرەما ب رێڤەبرنا هەلبژارتنان ڕاسپاردبوو.
هەڤدەم پشتی ئەڤرۆ جڤاتا نوونەرێن عیراقێ بڕیارا درێژکرنا ژیێ کۆمسیۆنا پەسەند کری، جۆمانا غەلای، پەیڤدارا کۆمسیۆنا بلند یا سەربەخۆ یا هەلبژارتنێن عیراقێ د ڕاگەهاندنەکێ دا دیارکر،”
هەلبژارتنێن پەرلەمانێ كوردستانێ دێ د دەمێ خۆ دا هێنە کرن و چ ئەگەرەک و بڕیارەک بۆ پاشخستن و ئەنجامنەدانا هەلبژارتنێن پەرلەمانێ کوردستانێ نینە، لەورا هەمی ئەوان دەنگۆیان ڕەت دکەین کو باس ل پاشخستن و ئەنجامنەدانا پرۆسەیا هەلبژارتنان د دەمێ خۆ دا دکەن.”
