قووناغێن بجهئینانا پرۆژەیێ فرۆكەخانەیا نێڤدەولەتییا دهۆكێ دێ دەستپێكەن

فرۆكەخانەیا نێڤدەولەتییا دهۆكێ دێ ل سەر هزار هێكتارێن زەڤییان هێتە دروستكرن و پرۆژە دێ چیتە د قووناغا دووێ یا بجهئینانێدا.

عەلی تەتەر پارێزگارێ دهۆكێ بۆ فه‌رمانگه‌ها میدیا و زانیارییان ڕاگەهاند، نه‌خشه‌یێ كه‌ڤن یێ فرۆكه‌خانه‌یا نێڤده‌وله‌تییا دهۆكێ كو پێشتر هاتبوو دانان، ل سه‌ر فه‌رمانا مه‌سرور بارزانى سه‌رۆكوه‌زیرێن هه‌رێما كوردستانێ، گوهۆرین تێدا هاتنه‌ كرن و نه‌خشه‌یه‌كێ نوو بۆ هاته‌ دانان، نوكه‌ حكومه‌تا هه‌رێمێ بۆ بجهئینانا قووناغێن پرۆژه‌ی، كار ل سه‌ر نه‌خشه‌یێ نوو دكه‌ت.

وه‌زاره‌تا ڤه‌گۆهاستن و گه‌هاندنێ دێ ب دوو قووناغان پرۆژه‌ى بجهئینیت، كارێ نه‌خشه‌سازى و پێداچوونێ بۆ پرۆژه‌یێ فرۆكه‌خانه‌یا نێڤده‌وله‌تییا دهۆكێ تمامبوویه‌ و دێ چیته‌ د بوارێ بجهئینانێدا.

دیلان ڕه‌شاد په‌یڤدارێ وه‌زاره‌تا ڤه‌گۆهاستن و گه‌هاندنێ ڕاگه‌هاند، ئه‌ڤ پرۆژه‌یه‌ دێ ب دوو قووناغان بیت، قووناغا ئێكێ دێ پێداچوون بۆ ماسته‌ر پلان و نه‌خشه‌یێ پرۆژه‌ى بیت، قووناغا دووێ ژى بجهئینانا وییه‌ ل سه‌ر ڕووبه‌رێ هزار هێكتارێن زه‌ڤییان، كو ب كوژمێ 12 ملیۆن و 832 هزار دۆلاران دێ هێته‌ بجهئینان.