ئاژانسا خانی:
ب مه‌ره‌ما خورتكرنا بزاڤا بازرگانى دناڤبه‌را هه‌ر دو وه‌لاتێن توركیا و عیراقێ دا و كاركرن بۆ سه‌ر سه‌قامگێرییا بهایێ دولارى به‌رامبه‌ر دینارى چه‌ندین پێنگاڤ هاتنه هاڤێتن.
د خه‌لیل غازی دۆسكی” ئه‌ندامێ لژنا دارایی ل په‌رله‌مانێ عیراقێ” بۆ ئاژانسا خانی دیار كر: ژ ئه‌نجامێ كۆمبوونێن شاندێ بلندێ بانكێن عیراقێ و بانكا ناڤه‌ندىیا حوكمه‌تا عیراقێ ب سه‌رپه‌رشتییا (عه‌لى عه‌لاق) پارێزگارێ بانكا ناڤه‌ندى ل گه‌ل شاندێ هه‌ڤپشكێن توركیا ل سه‌ر گوهورینا مامه‌لێن بازرگانى ژ دۆلارى بۆ لیرێ توركى و دینارێ عیراقێ رێككه‌فتن ل سه‌ر ئه‌ڤان خالان هاتییه كرن.
ناڤهاتی گۆت ژی” هه‌ر دو ئالى رێككه‌فتن ل سه‌ر گوهۆرینا بازرگانی دناڤبه‌را هه‌ردو ئالیاندا كو دینارێ عیراقى به‌رامبه‌ر یورۆیی و لیرێ توركى بهێـته بكارئینان” بۆ بازرگانیێن مه‌زن و هنارتنا مامه‌لان، رێككه‌فتن ل سه‌ر بكارئینانا یورۆیی و لیرێ توركى هاته‌كرن” دیسان بۆ بزاڤێن بازرگانى ژى دناڤبه‌را هه‌ر دو ئالیاندا و تایبه‌ت دناڤخوه دا هه‌ردو ئالی رێككه‌فتن كو دناڤا عیراقێ دا دینارێ عیراقى و ل توركیا لیرێ توركى و یورۆ بهێته بكارئینان.
هه‌ر دو شاندان دووپاتى كریه كو چه‌ندین كه‌نال و په‌نجه‌ره بۆ پاراستنا سیسته‌مێ دارایی یێ هه‌ر دو وه‌لاتان ژ هه‌ر مه‌ترسیه‌كێ بهێنه‌ڤه‌كرن، دیسا بۆ سه‌قامگێرى یا بهایێ دولارى دێ دۆلار ب بهایه‌كێ فه‌رمى ب بازرگانان هێته‌دان.
