ل هه‌یڤا شۆباتا 2024ێ هه‌لبژارتنێن په‌رله‌مانێ كوردستانێ دێ هێنه‌كرن، په‌یڤدارێ ده‌زگه‌هێ هه‌لبژاتنێن پارتى دیموكراتى كوردستان دیاركر، به‌رهه‌ڤییێن وان بۆ هه‌لبژارتنان ده‌ستپێكرینه و پارتى بۆ هه‌لبژارتنان یا به‌رهه‌ڤه.
هه‌وار محه‌مه‌د په‌یڤدارێ ده‌زگه‌هێ هه‌لبژارتنێن پارتى بۆ ئاژانسا خانى دیاركر، پارتى دیموكراتى كوردستان ب وى حكمى كو حزبه‌كا سه‌ره‌كییه ل گۆره‌پانا سیاسی ل سه‌ر ئاستێ عیراقێ و هه‌رێما كوردستانێ، گه‌له‌ك گرنگییێ ب هه‌لبژارتنان دده‌ت، هه‌موو ده‌مان بۆ پشكداریكرنێ د هه‌ر پرۆسه‌یه‌كا هه‌لبژارتناندا یا ئاماده‌یه.
دیار ژى كر، نوكه‌ژى وان به‌رهه‌ڤییێن تمام بۆ هه‌لبژارتنێن په‌رله‌مانێ كوردستانێ ل دووڤ رێكارێن كۆمسیۆنا هه‌لبژارتنێن عیراقێ كرینه، پرۆسه‌یا به‌رهه‌ڤییێن هه‌لبژارتنان یا درێژه و دڤێت ل دووڤ وان قووناغان بیت، یێن كۆمیسیۆن ڕادگه‌هینیت.
هه‌روه‌سا ئاشكراكر، كاروبارێن ب ڕێڤه‌برنا هه‌لبژارتنێن په‌رله‌مانێ كوردستانێ ب شێوه‌یه‌كێ تمام د ئاماده نینن، ژبه‌ركو ل دادگه‌ها فیدرالى سكالا ب دژى قانوونا هه‌لبژارتنێن كوردستانێ هاتییه تۆماركرن، لێكۆلین و پێداچوون بۆ وێ سكالایێ ژلایێ دادگه‌ها فیدرالیڤه بۆ 27ى ڤێ هه‌یڤێ هاتییه پاشخستن، ئه‌و چاڤه‌رێى وى ژڤانینه، داكو بزان رێكارێن كۆمسیۆنێ دێ چ بن و هه‌لبژارتن دێ ب چ شێواز هێنه‌كرن، دێ به‌رهه‌ڤییێن خوه ل دووڤ ده‌قێ قانوونا هه‌لبژارتنان كه‌ن.
