<h3 style="text-align: justify;"><span style="font-size: 18pt;">سه‌رۆكێ لقێ دهۆك یێ كۆمیسیۆنا بلندا هه‌لبژارتنێن عیراقێ ڕاگه‌هاند، به‌رهه‌ڤییێن وان بۆ هه‌لبژارتنێن جڤاتێن پارێزگه‌هان تمامبووینه، ئه‌ڤ جاره دێ كامیره‌یێن چاڤدێرییێ ل بنگه‌هێن ده‌نگدانێ هێنه دانان كو ئه‌ڤه دبیته جارا ئێكێ د دیرۆكا هه‌لبژارتناندا، كامیره دهێنه دانان.</span></h3> <h3 style="text-align: justify;"><span style="font-size: 18pt;">خالد عه‌باس سه‌رۆكێ لقێ دهۆك یێ كۆمیسیۆنا بلندا هه‌لبژارتنێن عیراقێ بۆ ئاژانسا خانى دیاركر، ل سنۆرێ پارێزگه‌ها دهۆكێ به‌رهه‌ڤییێن گه‌له‌كێن باش بۆ هه‌لبژارتنێن جڤاتا پارێزگه‌ها نه‌ینه‌وا هاتینه‌كرن، هه‌موو كه‌لوپه‌ل و ئامیره‌یێن ئه‌لكترۆنى یێن تایبه‌ت ب پرۆسه‌یا هه‌لبژارتن بۆ هه‌موو بنگه‌هێن ده‌نگدانێ هاتینه دابینكرن، ئابدێتا هه‌موو ئامیره‌یان هاتییه كرن، فه‌رمانبه‌ران ژى خۆلێن خوه ب دووماهى ئیناینه.</span></h3> <h3 style="text-align: justify;"><span style="font-size: 18pt;">ئاشكرا ژی كر، دهه‌لبژارتنێن بهێندا، ل دووڤ قانوونا ژماره ( 4 ) یا سالا 2023ێ، كامیره‌یێن چاڤدێرییێ ل هه‌موو وێستگه‌هـ و بنگه‌هێن ده‌نگدانێ دێ هێنه‌دانا، ل هه‌لبژارتنێن په‌رله‌مانێ كوردستانێ ژى دێ هێنه‌دانان، ئاماژه ب هندێ ژى دا، ئه‌ڤ كامیره گه‌له‌ك د پێشكه‌ڤتینه و دێ ل ده‌مژمێر حه‌فتى سپێدێ كاركه‌ن و هه‌تا ب دووماهى هاتنا ده‌مێ ده‌نگدانێ ل ده‌مژمێر شه‌شى مه‌غره‌ب دكاركریبن، هه‌روه‌سا ل ده‌مێ ڤاڤارتنا ده‌نگان ژى دی دكاركریبن، ئه‌ڤ چه‌نده دێ پتر شه‌فافییه‌تێ ب پرۆسه‌یا ده‌نگدانێ و ڤاڤارتنا ده‌نگان ده‌ت.</span></h3> <h3 style="text-align: justify;"><span style="font-size: 18pt;">ژلایه‌كێ دیڤه سه‌باره‌ت به‌لاڤكرنا كارتێن بایۆمه‌ترییێن ده‌نگده‌ران ئاشكراكر، 34 بنگه‌هێن ده‌نگدانێ ل پارێزگه‌ها دهۆكێ هه‌بن و 131 وێستگه‌هن، ژمارا وان كه‌سێن مافى هه‌ى ل پارێزگه‌ها دهۆكێ ده‌نگێ خوه بده‌ن زێده‌تر ژ 54 هزار كه‌سانه، ب تنێ 200 ئاواره ماینه كارتێن خوه وه‌رنه‌گرتینه.</span></h3>
