لایه‌نێن سوننى دێ بۆ ئێكلاكرنا به‌ربژارێ سه‌رۆكێ په‌رله‌مانى كۆمبن

سكرتێرێ گشتییێ پارتا به‌یارق خه‌یرییا عیراقى ڕاگه‌هاند، ئه‌ڤرۆ ل به‌غدا كۆمبوونه‌كا گرنگ ب پشكدارییا به‌هرا پترا پێكهاته‌یێن سه‌ره‌كییێن سوننه‌یان بۆ گه‌هشتنا ڕێككه‌ڤتنێ و دیاركرنا به‌ربژارێ پۆستێ سه‌رۆكێ په‌رله‌مانى دێ هێته‌كرن.

محه‌مه‌د خالدى سكرتێرێ گشتییێ پارتا به‌یارق خه‌یرییا عیراقى ئاشكراكر، ئه‌ڤرۆ ل به‌غدا كۆمبوونه‌كا گرنگ دناڤبه‌را لایه‌نێن سه‌ره‌كییێن سوننه‌یاندا دێ هێته‌كرن، بۆ هندێ ل سه‌ر ئێك به‌ربژار بۆ سه‌رۆكێ په‌رله‌مانى ڕێكبكه‌ڤن.

محه‌مه‌د خالدى گوت: نوكه‌ دناڤ لایه‌نێن سوننه‌یاندا به‌هرا پتر ئاخڤتن ل سه‌ر سالم عیساوى و مه‌حموود مه‌شهه‌دانى دهێته‌كرن كو ئێك ژ وان ببیته‌ جهێ ڕه‌زامه‌ندییا به‌هرا پترا سوننه‌یان، ده‌رفه‌ته‌كا مه‌زن هه‌یه‌ ئه‌ڤرۆ بهێته‌ ئێكركرن، ژبه‌ركو ده‌م ل به‌رده‌ست نه‌مایه‌ و دڤێت سه‌رۆكێ په‌رله‌مانى بهێته‌ هه‌لبژارتن داكو كارێن په‌رله‌مانى ڕانه‌وه‌ستن.

سكرتێرێ گشتییێ پارتا به‌یارق خه‌یرییا عیراقێ وه‌سا دبینیت، ئه‌و كه‌سێ دهێته‌ ده‌ستنیشانكرن، دڤێت كۆ ده‌نگییا هێزێن سوننه‌، كورد و شیعه‌یان ل سه‌ر بیت.