جڤاتا وه‌زیرێن هه‌رێما كوردستانێ ئه‌ڤرۆ ب سه‌رپه‌رشتییا سه‌رۆكوه‌زیران مه‌سرور بارزانى و ب ئاماده‌بوونا جێگرى وى قوباد تاله‌بانى كۆمبوو، ره‌وشا كاره‌بێ و چه‌ند بابه‌تێن دى گوتوبێژكرن.
كه‌مال محه‌مه‌د وه‌زیرێ كاره‌بێ دكۆمبوونێدا ڕاپۆرته‌ك سه‌باره‌ت ڕه‌وشا كاره‌بێ ل هه‌رێما كوردستانێ و ئاریشه‌یا ڤه‌قه‌تیانا گشتى ل سیسته‌مێ كاره‌با هه‌رێمێ ل ڕۆژا 30/11 و بزاڤ و پرۆژه‌یێن وه‌زاره‌تێ بۆ زێده‌كرنا به‌رهه‌مى و ڤه‌گه‌ریان بۆ به‌رنامه‌یێ ئاساییێ پێدانا كاره‌بێ و بابه‌تێ پرۆژه‌یێ پریپه‌ید و بهایان پێشكێشكر.
وه‌زیرێ كاره‌بێ دڕاپۆرتێدا ئاماژه ب هندێ دا، نوكه 3473 مێگاواتێن كاره‌بێ دهێنه به‌رهه‌مئینان و ڕه‌وشا كاره‌با نیشتیمانى پشتى ڤه‌قه‌تیانا گشتى، ئاساییبوویه و یه‌كه‌یێن به‌رهه‌مئینانا كاره‌بێ و ده‌مژمێرێن هه‌بوونا كاره‌با نیشتیمانى دناڤبه‌را هه‌شت بۆ 10 ده‌مژمێراندایه.
وه‌زیرێ كاره‌بێ به‌حسا بزاڤ و پرۆژه‌یێن وه‌زاره‌تێ بۆ زێده‌كرنا به‌رهه‌مئینانا كاره‌بێ ب رێیا مفاوه‌رگرتن ژ یه‌كه‌یین كۆمباین سایكلى و وێستگه‌هێن به‌رهه‌مئینانا كاره‌بێ و لێكۆلین ل ئه‌گه‌رێن ڤه‌قه‌تیانا گشتى كر كو، ڤى بابه‌تى ب تنێ ئاریشه‌یه‌كا ته‌كنیكى هه‌بوو و ئه‌وا دهاته گوتن كو هه‌رێما كودستانێ كاره‌با خوه یا نیشتیمانى د فرۆشیته ده‌ڤه‌رێن دیێن عیراقی ب نه دروست هژمارت، به‌لكو ڕوونكركو به‌رهه‌مێ كاره‌با هه‌رێمێ دادپه‌روه‌رانه ب سه‌ر هه‌موو ده‌ڤه‌رێن كوردستانێدا دهێته به‌لاڤكرن.
