ھه‌وار محەمەد: ل سەر پرۆسا هه‌لبژارتنێن جڤاتێن پارێزگه‌هان مه‌ 15 سکالا تۆمار کرینه‌

ئاژانسا خانی:

بەرپرسی یاسایی ل پشكا ھەلبژارتنێن پارتی دیموکراتی کوردستان گۆت: ل سەر پرۆسا ھەلبژارتنێن جڤاتێن پارێزگه‌هان ل عیراقێ ل ھەرسێ پارێزگه‌هێن کەرکووک و نەینەوا و دیالە مه‌ 15  سکالا تۆمار کرینە و ئه‌م چاڤه‌رێنه‌ ڤه‌كۆلین ل سه‌ر وان سكالان بهێته‌ كرن و ئه‌نجام ژی ژ لایێ كۆمسیۆنا بلندا هه‌لبژارتنێن عێراقێ ڤه‌ بهێنه‌ ئاشكرا كرن.

ھه‌وار محەمەد ، زێده‌تر بۆ ئاژانسا خانی دیار كر: ل سه‌ر ھەلبژارتنێن جڤاتێن پارێزگه‌هێن عێراقێ ل ھەرسێ پارێزگه‌هێن کەرکوک، نەینەوا و دیالە مه‌ 15 سکالا تۆمار کرینە و ئه‌م چاڤه‌رێنه‌ ئەنجام ب دەستی ژ لایێ كۆمسیۆنێ ڤه‌ بهێنه‌ ھژمارتن و بهێنه‌ راگه‌هاندن و پاشی ئەنجامێن لێکۆلینێ دیار ببن، ل وی ده‌می ب فەرمی دێ بۆچوونا پارتی دیموكراتی كوردستان هێته‌ راگه‌هاندن.

ناڤهاتی ئه‌و چه‌ند ژی گۆت: ل ھەرسێ پارێزگه‌هان مه‌ سکالا تۆمار کرینە، كو 10 سکالا ل کەرکووکێ بووینه‌ و سێ سکالا ل نەینەوا و دو سکالا ژی ل دیالە هاتینه‌ تۆمار کرن و ئه‌و سكالا ژی پتر ل سەر ڕێگرییا ئەمنی ل دەنگدەرێن پارتی و دیسان ژ روویێ تەکنیکی ژی بووینە” كو ئامیرێن ده‌نگدانێ په‌نجه‌مۆر نه‌خواندن و پێدڤی بوو” ئه‌و كێماسییه به‌ری هنگێ ژ لایێ كۆكمیسیۆنێ ڤه‌ هاتبا چاره‌سه‌ر كرن” دیسان ل نه‌ینه‌وا ژی كێشه‌ بۆ ده‌نگده‌رێن مه‌ دروست بووینه‌” له‌وما ئه‌م دخوازین كۆمسیۆنا بلندا هه‌لبژارتنان پێداچوونێ د وان سكالایان دا بكه‌ت.