رێڤەبەریا کەشناسی و بیڤەلەرزەزانی دھوك دیاركریه ده‌مژمێرێن سپێدەیا رۆژا ئەینی دێ دەسپێکا بەلاڤبوونا باران بارینێ بیت دگەل چالاکیا لەزا بایێ رۆژھەلات کۆ نێزیکی لەزاتیا ٤٠ کم د دەمژمێرەکێ دا بیت، و لسەر بلنداھیێن دەڤەرێن بەرواری بالا بارین ھێتە گھورین بەرەف بەفربارینێ، ھەروەسا ئاستێ باران بارینێ ناڤنجی و بەردەوام بیت لسەر دەڤەرێن ناڤەندێن پارێزگەھا دھوکێ.
دگەل دەمژمێرێن ئەینی بشەف و سپێدەیا شەمبیێ رەوشا باران بارینێ بھێزتر و بەردەوام بیت و بەفر لسەر ئاستێن بلنداھیێن نزمتر باریت ل چیایێن گارە و مەتین ( ١٥٠٠ مەتر لسەر ئاستێ روویێ دەریای), دگەل چالاکیا بھێز یا بایێ باشور و بەردەوامیا بارینا بارانێ لسەر دەڤەرێن رۆژھەلات و باکورێ رۆژھەلاتێ پارێزگەھا دھوکێ ئەڤ رەوشە دێ یا چالاک و بەردەوام بیت تا شەڤا ئێک شەمبی یان سپێدەیا دووشەمبی.
