ئاژانسا خانی:
نوونەرێ حکومەتا ھەرێمی کوردستان ل فەرماندەیا ئۆپه‌راسیۆنێن هه‌ڤپشك یێن عێراقی ل بەغدا دیار كر: دو لیوایێن هه‌ڤپشك یێن پێشمەرگەیی و سوپایێ عێراقێ ل ده‌ستپێكا هه‌یڤا ئادارێ ل سالا بهێت دێ دەستبکار بن و ئه‌و هێزه ل ده‌ڤه‌رێن خانەقین و کەرکووک و مەخمور دێ هێنه به‌لاڤكرن.
لیوا عەبدولخالق تەلعەت، زێده‌تر بۆ ئاژانسا خانی گۆت: ئه‌ڤه نێزیكی هه‌یڤه‌كییه هه‌ردو لیوایێن هه‌ڤپشك یێن پێشمەرگەیی و سوپایێ عێراقێ دەست ب مەشق و ڕاھێنانان کرییە و بۆ ده‌مێ سێ هه‌یڤان دێ ل سه‌ر مەشق و ڕاھێنان بەردەوام بن، پاشی دێ دەستبکار بن و ل ده‌ڤه‌رێن کوردستانی، ل خانەقین و کەرکووک و مەخمور دێ هێنه به‌لاڤكرن، هه‌روه‌سا لدووڤ ڕێککەفتنێ ئه‌و جھێن بۆ هاتینه دیار کرن ڤالاهییێن ئەمنی لێ ھەنە، بارەگه‌هێ سەرەکی یێ وان لیوایان دێ ل کەرکووکێ بیت.
ناڤهاتی گۆت ژی: ھەبوونا ھێزێن پێشمەرگەیی ل وان ده‌ڤه‌ران دێ ھاریکارییەکا باش بیت بۆ خه‌لكێ کورد بۆ هندێ کەس نەشێت زۆرییێ ل وان بکه‌ت و ئه‌ردێن وان داگیر بکه‌ت، چونکی ژ وان هه‌ردو لیوایان دێ ئامر لیوایەک کورد بیت و جێگرێ وی ژی دێ عەرەب بیت و لیوایا دووێ دێ ئامر لیوا عەرەب بیت و جێگر دێ کورد بیت، ئەڤە ئێكلایی بوویە، هه‌روه‌سا بڕیاره ل ده‌ستپێكا هه‌یڤا ئادارا سالا بهێت ل ده‌ڤه‌رێن کوردستانی ھەردو لیوا دەستبکار بن.
