سه‌نته‌رێ پێدانا ڤیزه‌یا فره‌نسا ل هه‌ولێرێ هاته ڤه‌كرن و یان برێم كونسۆلێ گشتییێ فره‌نسا ل هه‌ولێرێ ڕاگه‌هاند، ئارمانجا وان ژ ڤه‌كرنا ڤى سه‌نته‌رى ئاسانكاریكرنه د پێدانا ڤیزێدا ب وه‌لاتى و گه‌شتیار و وه‌به‌رهێنه‌ران.
یان برێم گوتى: ئارمانجا كونۆسلخانه‌یا فره‌نسا ل هه‌ولێرێ ئه‌وه گه‌شتیار، خوێندكار و وه‌به‌رهێنه‌رێن زێده‌تر بۆ وه‌لاتێ خوه ڕابكشێت، كارێ سه‌نته‌رێ پێدانا ڤیزێ ل ده‌ڤ وان گه‌له‌ك یێ گرنگه، ژبه‌ركو دێ ئاسانكارییان بۆ چوونا وه‌لاتییان بۆ فره‌نسا كه‌ت.
گوت ژى : ئه‌ڤ سه‌نته‌ره ل 80 وه‌لاتێن جۆدا هه‌یه و ئاسانكارییان د پێدانا ڤیزێدا دكه‌ت، كۆمه‌كا ئارمانجان هه‌نه، ئاسانكارییان بۆ وه‌رگرتنا چاڤپێكه‌ڤتنا ڤیزێ و ڕێكخستنا كه‌یسێن تایبه‌ت ب وه‌رگرتنا ڤیزێ دكه‌ت.
كونسۆلێ فره‌نسا ڕاگه‌هاند ژى: وه‌رگرتنا چاڤپێكه‌ڤتنا ڤیزێ بێ به‌رامبه‌ره، پێدڤى ناكه‌ت بۆ وه‌رگرتنا چاڤپێكه‌ڤتنا ڤیزێ سه‌ره‌دانا نڤیسینگه‌هێن گه‌شتیارى بهێته‌كرن.
سه‌فین دزه‌یى به‌رپرسێ فه‌رمانگه‌ها په‌یوه‌ندییێن ده‌رڤه یێ حكومه‌تا هه‌رێما كوردستانێ ڕاگه‌هاند، ڤه‌كرنا ڤى سه‌نته‌رى بۆ وه‌رگرتنا ڤیزه‌یا وه‌لاتێ فره‌نسا، ده‌رفه‌ته‌كا گه‌له‌ك باشه بۆ هندێ وه‌لاتییێن هه‌رێما كوردستانێ ب ئاسانى سه‌ره‌دانا ده‌رڤه‌ى وه‌لاتى بكه‌ن و ڤه‌گه‌ڕن.
