ئاژانسا خانی:
ل حه‌فتییا بهێت پەرلەمانێ عێراقێ دێ كۆم بیت و دبیت د وێ كۆمبوونێ دا پۆستێ سەرۆکێ پەرلەمانی بهێته ئیكلاكرن و د خواندنا ئێكێ یان دووێ دا سه‌رۆكه‌كێ نوو بۆ په‌ره‌لمانێ عیراقێ بهێته دانان.
خالد رێكانی” ئه‌ندامێ په‌رله‌مانێ عیراقێ ژ فراكسیۆنا پارتی دیموكراتی كوردستان” بۆ ئاژانسا خانی گۆت: بریارە ل حه‌فتییا بهێت پەرلەمانێ عێراقێ دەست ب کۆمبوونێن خۆ بکه‌ت و د كۆمبوونا خۆ یا ئێكێ دا دێ دانوستاندن ل سه‌ر ھەلبژارتنا سەرۆکێ نوو یێ پەرلەمانی هێته کرن، هه‌كه لایەنێن سوننی نەگەهنه رێککەفتنێ ئەگەر ھەیە ئه‌و کۆمبوون بۆ چه‌ند رۆژان بهێته پاشخستن هه‌تا رێککەفتن دهێته کرن دناڤبه‌را ئالییێن سوننی دا.
ناڤهاتی گۆت ژی: مه وەکو فراکسیۆنا پارتی و فراکسیۆنێن دیتر یێن کوردستانی گه‌له‌ك بزاڤ كرینه و د وێ كۆمبوونێ دا دێ پڕۆژێ مه یێ ئێكێ ھەمواركرنا یاسایێ بودجەیێ عێراقێ بیت” ژ پیخه‌مه‌ت مووچەیێ فەرمانبەرێن ھەرێما کوردستانێ د ده‌مێ خۆدا بهێنه هنارتن، هه‌روه‌سا شاندێ هه‌رێما كوردستانی سه‌ره‌دانا به‌غدا كرییه و نوكه لێكتێگه‌هشتنه‌كا باش دناڤبه‌را مه و عێراقێ دا هه‌یه.
