ھنارتنا نەفتا ھەرێمێ بۆ دەرڤە یا گرێدایه‌ ب هه‌مواركرنا برگا تێچوویێ ده‌رخستنا هه‌ر به‌رمیله‌كێ نه‌فتێ ل هه‌رێمێ

ئاژانسا خانی:

د. سەباح سوبحی، ئەندامێ لژنا نەفت و غازێ ل پەرلەمانێ عێراقێ بۆ ئاژانسا خانی گۆت: پێشتر وەزارەتا نەفتا عێراقێ سەره‌دانا ھەولێرێ کربوو و ل گەل کۆمپانییێن نەفتێ کۆمبوونه‌ك کربوو” دناڤبه‌را هەردو ئالییان دا لێکتێگەهشتنه‌كا باش ھەبوو بۆ هندێ تێچوویێ دەرخستنا نەفتێ بهێته‌ زێده‌ كرن، نوكه‌ ڕێککەفتن ل وەزارەتا نه‌فتێ هاتییه‌ کرن کو تێچوویێ دەرخستنا نەفتێ بۆ ھەر بەرمیله‌كێ دناڤبه‌را ١٨ بۆ ٢٠ دۆلاران بیت، وه‌سا بڕیارە بهێته‌ ڕەوانەكرن بۆ جڤاتا وەزیران، ئەو ژی بۆ ھەموارکرنێ دێ ڤرێكه‌نه‌ پەرلەمانی، چونکی ئەو بڕگە یا گرێدایە ب مادێ ھەمواركرنا مووچەیێ فەرمانبەران، د مادێ ١١ یێ بڕگا دووێ، د قانوونا بودجەیی دا به‌حس دكه‌ت” كو پێدڤییە ھەردو پێکڤە بهێنه‌ ھەموار کرن، هه‌كه‌ بهێته‌ ھەموار کرن دێ ھنارتنا نەفتا ھەرێما کوردستانێ بۆ دەرڤه‌ چ بەربەست نامینن و دێ دەستپێكه‌ت.

ناڤهاتی گۆت ژی: رێككه‌فتن هاتییه‌ كرن و نوكه‌ هاتییه‌ جهگیرکرن بۆ هندێ دناڤا هۆلا پەرلەمانی دا بهێته‌ ھەمواركرن، چونکی وان دڤێت ھنارتنا نەفتا ھەرێما کوردستانێ زوو دەستپێبکه‌ته‌ڤه‌” هه‌روه‌سا نه‌هنارتنا نه‌فتا هه‌رێمێ د بەرژەوەندییا حکومەتا عێراقێ ژی دا نینە، چونکی زیانێن نه‌هنارتنا نه‌فتا هه‌رێمێ نوكه‌ دگه‌هنه‌ پتر ژ ١٣ملیار دۆلاران، بتنێ ئەو بەربەستە مابوو ئەو ژی دێ تەمام بیت و ھنارتنا نەفتا ھەرێما کوردستانێ دێ دەستپێكه‌ته‌ڤه‌، نوكه‌ ئه‌م چاڤەرێی ھاتنا ھەمواركرنا قانوونا بودجەیی دکەین بۆ پەرلەمانی، هەرده‌مێ بگه‌هیت دێ دەست ب ھەموارکرنێ کەین.