كۆنسۆلخانەیا ئەمریكا ل هەولێرێ د ڕاگەهاندنەكێدا دیاركر، پێشێلكاری بەرامبەر ڕۆژنامەنڤیسان ل هەرێما كوردستانێ ب ڕەنگەكێ بەرچاڤ كێم بووینە.
ئەڤرۆ ڕۆژا چارشەمبی كۆنسۆلخانەیا ئەمریكا ل هەولێرێ ڕاگەهاند، چەند ڕاپۆرتێن سالانە یێن ناڤەندێن چاڤدێرییێ یێن ئازادییا ڕاگەهاندنێ ل هەرێما كوردستانێ نیشانددەن كو پێشێلكارییێن ئازادییا ڕاگەهاندنێ بۆ سالێن 2022 بۆ 2023 كێم بووینە، بتایبەت كێمبوونا بەرچاڤ یا دەستەسەركرنا ڕۆژنامەڤانان.
دیار ژی كریە، ” دیتنا ڤان گوهوڕینان جهێ هاندان و دەستخۆشییێن مەیە بۆ حكومەتا هەرێما كوردستانێ ژبەر بزاڤێن وان بۆ باشتركرنا ژینگەها میدیا و ڕاگەهاندنێ. لێ هێشتا ڕۆژناماڤان و ناڤەندێن چاڤدێرییێ ڕاپۆرتێن پێشێلكارییان ل سەر هندەك لایەنێن میدیایی بەلاڤدكەن، ژوان ژی گەهشتن ب زانیارییێن گشتی و پشكداربوون د وان كۆنگرێن ڕۆژنامەڤانی دا یێن حكومەت ڕێكدئێخیت. “
كۆنسۆلخانەیێ زێدەتر دیاركریە، ” ب مەرەما باشترکرنا شیانێن حكومەتا هەرێما كوردستانێ د بەرسڤدانا پرسیارێن ڕاگەهاندكاران دا د دەمێ خۆ دا، كار ل سەر وێ یەكێ دهێتەكرن پەیڤدارێن ناڤەندێن جوداجودا یێن حكومەتا هەرێمێ بهنێرینە ویلایەتێن ئێكگرتی یێن ئەمریكا دا ب ڕەنگەكێ باشتر ببینن كا نڤیسینگەهێن ڕاگەهاندنێ د حكومەتا مە یا ئەمریكا دا چەوا كارێن خۆ دكەن. “
