گەندەلییێ دناڤا سه‌قایێ سیاسییێ عێراقێدا وەسا رهێن خۆ داهێلاینه، هنده د ناڤا ته‌خا سیاسی و دەستهه‌لاتدارێن بەغدا دا دێ وه‌كو کلتووره‌كی لێ هێت و ئەوێن تووشی ئەوی ڤایرۆسی نەبووین ب تبلێن دەستان دھێنه هژمارتن. سال پشتی سالێ قەبارە و جۆرێ گەندەلییێ ل عێراقێدا داهێنان تێدا دھێته کرن.
حەیدەر حەنوون، سەرۆکێ دەستەیا دەستپاکییا عێراقێ دیاركر، ل سالا 2023 ێ، نێزیکی 430 ملیار دینار کو ب گەندەلییێ هاتبوو کۆمکرن هاتینه ڤه‌گه‌راندن بۆ ده‌وله‌تێ” هه‌روه‌سا ل سالا 2023 ێ دا، 18 هزار و 868 کەس ب تۆمەتا گەندەلییێ رووبروو دادگه‌هێ بووینه، كو دناڤا واندا 55 وەزیر و 350 پلەیێن بلند ل ئاستێ رێڤەبەرێن گشتی هەنه.
دیسان دەستەیا دەستپاکییا عێراقێ ل سالا 2023 ێ دا، 11 هزار و 186 بریارێن گرتنێ دەرکرینە و ژ وێ هژمارێ ژی 7 هزار و 856 هاتینه بجهئینان.
ب تۆمەتا ئه‌نجامدانا گەندەلییێ و بده‌ستڤه‌ئینانا داهاتی ژ ژێده‌رێن نه‌شەرعی قەدەغەیا گەشتكرنا دەرڤه‌یی وه‌لاتی بۆ 228 بەرپرسان هاتییه كرن، کو نه‌هـ کەس ژ وان وەزیرێن به‌رێنه.
دیارترین ئەو میکانیزم و رێكێن بەرپرسێن عێراقی بۆ ئەنجامدانا گەندەلییێ و کۆمکرنا پاران بكاردئینن” پێكدهێن ژ بەرتیل وەرگرتنێ، سه‌ختەکارییێ، ب هەدەردانا سامانێ گشتی، بکارئینانا پێگەهێن خۆ بۆ کارێن تایبەت و تشتێن دیتر.
