بڕیارا پارتی كارڤەدانێن ناڤخۆیی و نێڤده‌وله‌تى ل دووڤ خۆ ئینان

مالپەڕێ شەرقولئەوسەت دڕاپۆرتەكێدا ڕاگەهاند، بڕیارا پارتی ل دۆر پشكدارینەكرنێ دهەلبژارتنێن پەڕلەمانێ كوردستانێدا، دێ هەڤپەیمان و نەیارێن وێ پارتێ ل بەغدا و دەڤەرێ نەچاركەت كو نەڕازیبوونێن پارتی بەرامبەر بڕیارێن دادگەها فیدڕالی ل بەرچاڤ وەربگرن.

د ڕاپۆرتەكێ دا كو ل مالپەڕێ شەرقولئەوسەت ب زمانێ فارسی هاتییە بەلاڤكرن ئاماژە ب وێ چه‌ندێ هاتییەكرن، سەرەنجدان ب وان بها و هێزێن پارتی دیمۆكراتی كوردستان هەین، ئەڤ بڕیارە دێ كارتا لایەنان ل هەرێما كوردستانێ و عیراقێ تێكشێلیت و هەڤپەیمان و دژبەرێن پارتی ل بەغدا و دەڤەرێ نەچاركەت، نەڕازیبوونێن ڤێ پارتێ ل بەرامبەر بڕیارێن دادگەها فیدڕالی به‌رچاڤ وەربگرن.

ڕاپۆرتێ چەندین بڕگە ژ ڕاگەهاندنا مەكتەبا سیاسییا پارتی شیكاركرینە و تیشك ئێخستییە سەر بڕگەیەكێ كو بەحس ل هەلوەشاندنا كورسییێن پێكهاتەیان ژلایێ دادگەها فیدڕالی ڤە دكەت و دبێژیت: ژ ئەگەرێ بڕیارا دادگەها فیدڕالی، پێكهاتێن كوردستانێ نەشێن كورسییێن خۆ یێن تایبەت هەبن.

دووپاتژی كرییە، بڕیارێن دادگەها فیدڕالی بۆ مەرەما لاوازكرنا پێگەهێ دامودەزگەهێن دەستووری یێن هەرێما كوردستانێ نە، ل دووماهییا ڕاپۆرتێ ژی هاتییە، دبیت بڕیارا مەكتەبا سیاسییا پارتی ببیتە ئەگەر لایەنێن كوردستانی ب كۆدەنگی بڕیارێ ل سەر پاشخستنا ژڤانێ هەلبژارتنێن كوردستانێ بدەن.