ئاژانسا خانی:
بریکارێ وەزارەتا چاندنێ یێ حکومەتا ھەرێما کوردستانێ دیار كر: ئه‌ڤ ساله بارانێن باش بارینه و بەرھەمێ گەنمی گه‌له‌كێ باشە و لدووڤ وێ رێپیڤانا هاتییه کرن، دو ملیۆن و 700 هزار ته‌نێن گەنمی دێ هێنه به‌رهه‌مئینان و ئه‌م ل گەل حکومەتا عێراقێ ل سەر هێلێینه” داكو ئه‌ڤ ساله رێژا هه‌ره مه‌زن یا گەنمی ل ھەرێما کوردستانێ بهێته وەرگرتن.
کەریم سلێمان، زێده‌تر بۆ ئاژانسا خانی دبێژیت: چەند باران بباریت، دێ بۆ چاندنێ باشتر بیت و هه‌تا نوكه بارانێ چ کاریگەرییێن خراب ل سەر بەرھەمێ چاندنێ نه‌بووینه، ب تایبەتی ژی بەرھەمێ گەنمی، دیسان ژ ئه‌گه‌رێ باران بارینێ ئاڤا ژێر ئه‌رد دێ بلند بیت و سكر و پۆند ژی تژی ئاڤ بووینه، بەلێ ب ره‌نگه‌كێ گشتی بارانبارین زۆر یا باشە و ئەڤ ساله چاندن دێ یا بەرھەمدار بیت.
ناڤهاتی گۆت ژی: هه‌ر ل ده‌ستپێكا چاندنا گەنمی” ئه‌م کار دکەین ل گەل وەزارەتا چاندنێ و بازرگانییا عێراقێ و ب رێیا نوونەراتییا حکومەتا ھەرێما کوردستانێ ل سەر چەند بابەتێن گرێدایی چاندنێ ل سەر هێلین، ئەڤ ساله بهایێ ھەر ته‌نه‌كا گه‌نمی دێ 850 هزار دینار بن و ب ره‌نگه‌كێ گشتی ل عێراقێ شه‌ش ملیۆن ته‌نێن گه‌نمی دێ ژ جۆتیاران هێنه وەرگرتن، ئاریشا مه ل ھەرێمێ ئەوە، كو عێراق گەنمێ مە ھەموویێ وەرناگریت و پار ژی ب تنێ 500 ھزار ته‌نێن گه‌نمی وه‌رگرتن و نوكه ئه‌م ل سەر هێلین بۆ هندێ ئه‌و رێژه بهێته زێده كرن.
بریكارێ وه‌زاره‌تا چاندنێ هێشتا دبێژیت: ب ره‌نگه‌كێ ئەکادیمی و زانستی ھنده‌ك مامۆستایێن زانکۆیا سەلاحەدین رێپیڤانه‌ك ئه‌نجامدایه بۆ ھەموو ئه‌ردێن ھەرێما کوردستانێ، دیار بوویه كو ئه‌ڤ ساله نێزیکی دو ملیۆن و 700 ھزار دۆنه‌مێن ئه‌ردی كرینه گه‌نم، هه‌كه بەرهەمێ ھەر دۆنمه‌كێ ته‌نه‌ك بیت، بەرھەم دێ بیتە دو ملیۆن و 700 هزار ته‌نێن گەنمی، هه‌ر چه‌نده یا ب زه‌حمه‌ته ئەوێ هژمارێ ژ مە وەربگرن.
