هەژمارەكا سیناتۆر و ئەندامێن جڤاتا نوینەرێن ئەمریكا نامەیەك ئاراستەی جۆ بایدن، سەرۆكێ ئەمریكا كر و تێدا دلگرانییا خۆ ل دۆر مێهڤانداریكرنا محەمەد شیاع سوودانی، سەرۆكوەزیرێن عیراقێ ل ئەمریكا دەربڕی و داخواز ژ بایدنی كر کو گڤاشتنێ ل سەرۆكوەزیرێن عیراقێ بکەت دا پڕوسا هنارتنا پەتڕۆلا هەرێمێ دەستپێبکەت و شایستەیێن دارایی یێن هەرێمێ بمەزێخیت.
دوهی ڕۆژا 28 ئادارێ، هەشت کۆنگرێسمانێن ئەمریکا ( چوار ئەندامێن جڤاتا نوینەران و چوار ئەندامێن جڤاتا پیران ) نامەیەك ئاراستەی جۆ بایدن كر و تێدا دلگرانییا خۆ ل دۆر مێهڤانداریكرنا محەمەد شیاع سوودانی ل كۆچكا سپی دەربڕی.
د ناما كۆنگرێسمانان بۆ جۆ بایدنی دا هاتییە:
” حكومەتا عیراقێ ل ژێر كارتێكرنێن ئیرانێدایە و سالانە نێزیكی سێ ملیار دۆلاران بۆ هێزێن حەشدا شەعبی و گرۆپێن میلیشیایان خەرج دكەت. ئەوان گرۆپێن میلیشیایان ژ ڕۆژا 7 ئوكتۆبەرا سالا بووری هەتا نوكە 180 جاران هێرش كریە سەر هێزێن ئەمریكا و هەرێما كوردستانێ.
حكومەتا عیراقێ ب شێوەیەكێ چالاك ل گەل ئیرانێ دژی هەڤپەیمانێن مە یێن كورد كاردكەت، نمونە ژی بڕینا هاریكارییێن دارایی یێن حكومەتێ و داخستنا بۆڕییا پەتڕۆلا عیرق – توركیا كو پشكەكا مەزن یا ئابوورێ كوردستانێ ل سەر بەندە. پێدڤییە سەرنجا هەوە ل سەر كێمكرنا كارتێكرنا ئیرانێ ل سەر عیراقێ و پشتەڤانیكرنا هەڤپشكێن مە ل كوردستانێ بیت.
هەر د وێ نامێ دا داخوازا دانانا مەرجێن پێشوەخت بۆ سەرەدانا سوودانی هاتییەكرن و گۆتییە: وەك پێشمەرج بۆ سەرەدانا محەمەد شیاع سوودانی، پێدڤییە داخواز بهێتەكرن كو ئێكسەر بۆڕییا پەتڕۆلا عیراق – توركیا بهێتە ڤەكرن داكو كوردستان بشێت دەست ب هنارتنا پەتڕۆلێ بكەت و داخواز ژ حكومەتا عیراقێ بكەت شایستەیێن دارایی یێن هەرێمێ بهنێریت.
ڕۆژا ئەیینی 22-03-2024، كۆچكا سپی د ڕاگەهاندنەكێ دا بەلاڤكر، ڕۆژا 15-4-2024 جۆ بایدن، سەرۆکێ ئەمریکا ل كۆچكا سپی دێ پێشوازییێ ل محەمەد شیاع سوودانی، سەرۆكوەزیرێن عیراقێ كەت.
