ل دویڤ ڕاگەهاندنەكا سەرۆكاتییا هەرێما كوردستانێ محەمەد شیاع سوودانی و نێچیرڤان بارزانی د كۆمبوونا خۆ دا گوتوبێژ ل دۆر چەند پرسەكێن گرنگ كریە، ژوان ژی مووچەیێ مووچەخۆرێن هەرێمێ و پرسا هنارتنا پەتڕۆلێ.
ڕاگەهاندنێ دیار كریە سوودانی د كۆمبوونێ دا ئاماژەكریە، ئەو ڕژدن ل سەر هنارتنا مووچەیێ مووچەخۆرێن هەرێمێ و نێچیرڤان بارزانی ژی خۆشحالییا خۆ بۆ ڕێككەفتنا سەرۆكوەزیرێن هەرێمێ و عیراقێ بۆ پرسا مووچەی دەربڕی و ڕاگەهاندیە، هیڤیدارین ب زویترین دەم ئاریشا پرسا پەتڕۆلێ ژی بهێتە چارەكرن.
پشتی ب دوماهی هاتنا كۆمبوونێ سوودانی دیار كر، د گوتوبێژان دۆپاتی ل سەر چارەسەركرنا هەمی كێشەیێن هەلاویستی هاتەكرن د چارچووڤێ دەستووری دا.
ل دۆر پرسا مووچەی ژی ئاماژەكر، ل ژێر ڕۆشنايیا لیستێن فەرمی یێن فەرمانبەران و سەرجەم وەزارەتان و ئەو توێژێن ناڤێن وان هاتین و ژلایێ هەردوو دیوانێن چاڤدێرییا دارایی یا هەرێمێ و فیدڕال ڤە هویربینی بۆ هاتییەكرن، وان دەستپێشخەرییا هنارتنا مووچان كریە و دۆپات ژی كر ئەو د ڕژدن ل سەر بەردەوامییا هنارتنا مووچەی.
گۆت ژی: گوتوبێژ ل سەر دۆسەیێن دی ژی هاتییەكرن، ب تایبەتی ئەوێن پەیوەندی ب دەستپێكرنا پڕۆسەیا هنارتنا پەتڕۆلێ ڤە هەی و هەمی چالاکی و کۆمبوون ب وی ئاراستەی دا دچن، کو دۆپاتییێ ل سەر لێکتێگەهشتن و کارێ پێکڤەیی دکەن، ب جۆرەکی خزمەتا سەرجەم خەلکێ عیراقێ بکەت بێ جیاوازی.
