سه‌رۆكێ هه‌رێما كوردستانێ ل 36 سالییا ئه‌نفالێ ڕاگه‌هاند، داخوازا خوه بۆ حكومه‌تا عیراقێ بۆ ب جهـ گه‌هاندنا دادوه‌رییێ دووپات دكه‌ن، كو ئه‌ركێ خوه بجهبینیت و قوربانییان ژ هه‌موو لایانڤه قه‌ره‌بوو بكه‌ن.
نێچیرڤان بارزانى سه‌رۆكێ هه‌رێما كوردستانێ دبێژیت: ئه‌ڤرۆ بیره‌وه‌رییا خه‌مگینا 36 سالییا تاوانا ئه‌نفالێیه و زێده‌تر ژ 182 هزار زارۆ و ژن و زه‌لام و گه‌نجێن ئه‌نفالكرییێن كوردستانێ ل بیر دئینن، كو د ئێك ژ مه‌زنترین تاوان و جینۆسایدێن مێژوویێدا ل سالا 1988 ل سه‌ر ده‌ستێ ڕژێما وى ده‌مى یا به‌غدا هاتنه شه‌هیدكرن و پاشمایێن وێ هه‌تا نوكه دبه‌رده‌وان و دێ هه‌تا پاشه‌رۆژه‌كا درێژ دێ دبه‌رده‌وامبن، دڤێ هه‌لكه‌ڤتێ دا ب ڕێزڤه وان ل بیر دئینن و سه‌رێ ڕێز و نه‌وازشێ ل به‌رده‌م گیانێ وان یێ پاقژ دچه‌مینن.
دپشكه‌كا دییا په‌یاما خوه‌دا نێچیرڤان بارزانى دیاركر، د ده‌مه‌كیدا داگه‌ها بلندا تاوانێن عیراقێ ئه‌ڤ تاوانه ب جینۆساید دایه نیاسین، داخوازا خوه بۆ حكمه‌تا عیراقێ بۆ ب جهـ گه‌هاندنا دادوه‌رییێ دووپات دكه‌ن، هه‌روه‌سا ئاشكراكر، دڤێت حكومه‌تا عیراقێ ئه‌ركێ خوه بجهبینیت و قۆربانییان ژهه‌موو لایانڤه قه‌ره‌بوو بكه‌ت، دووپاتییێ ل خزمه‌تكرنا باشتر یا كه‌سوكارێن سه‌ربلندێن ئه‌نفالكرییان د هه‌موو بیاڤاندا دكه‌ن و دڤێت بێخه‌مى تێدا نه‌هێته‌كرن.
سه‌رۆكێ هه‌رێما كوردستانێ سه‌باره‌ت پرۆسه‌یا لێگه‌ریانێ ل ڕووفاتێن شه‌هیدێن ئه‌نفالێ ڕاگه‌هاند، ئه‌و كه‌سوكارێن ئه‌زیزێن ئه‌نفالكرییان پشت راست دكه‌ن كو پرۆسه‌یا لێگه‌ریانێ ل ڕووفاتێن شه‌هیدان و ڤه‌گه‌راندنا وان بۆ باوه‌شا نیشتیمانى دێ یا به‌رده‌وام بیت، هه‌روه‌سا دووپاتییێ ل كار و بزاڤێن هه‌موو لایان دكه‌ن، بۆ هندێ تاوانا ئه‌نفالێ ل سه‌ر ئاستێ نێڤده‌وله‌تی ژى ب جینۆساید بهێته نیاسین، چ جاران تاوانه‌كا ژ وى جۆرى ل چ جهێن جیهانێ دووباره نه‌بن.
نێچیرڤان بارزانى ل دووماهییا په‌یاما خوه دووپاتى ل ته‌بایى و پێكڤه‌ییا تماما هه‌موو لایه‌ن و پێكهاته‌یێن كوردستانێ كر، ب مه‌رجێ پاراستن و مانێ و ماف و ده‌ستكه‌ڤتان و فیدرالى و قه‌واره‌یێ ده‌ستوورییێ كوردستانێ هژمارت، دیار ژى كر، یادا شه‌هیدان هه‌رده‌م ب خێر بیت و سلاڤ ل گیانێ وان یێ پاقژ بیت، سلاڤ ل خێزان و كه‌سوكارێن ئه‌نفالكرییان و تماما شه‌هیدێن كوردستانێ بن.
