ئەڤرۆ 13-05-2024، ژێدەرەكێ بلند یێ لقێ هەولێرێ یێ بانکا بازرگانییا عیراقێ (تی بی ئای) ڕاگەهاند، ”ڤەكرنا هەژمارا بانکییا مووچەخۆرێن هەرێما کوردستانێ ژ لایێ مەڤە، دڤێت ب ڕێكا پڕۆژەیێ هەژمارا من بیت.”
هەروەسا دیاركر ژی، بتنێ ب ڕێكا هەژمارا من، هژمارا بانكی بۆ مووچەخۆرێن هەرێما كوردستانێ دێ ڤەكەین، هەر چەند فەرمانبەرەكی بڤێت دشێن ژ لایێ وان هژمارا بانكی ڤەكەن و ژمارەكا سنووردار نینە.
هەما ژێدەری دیاركر، هەتا نوكە یا دیار نینە ئەو مووچەخۆرێن ب ڕێكا پڕۆژەیی هەژمارا بانکی بۆ ڤەدكەین، هەمان خزمەتگوزاری پێشکێش بكەت كو یا پێشکێشی مووچەخۆرێن دەڤەرێن دی یێن عیراقێ دهێتەكرن.”
دهێتە زانین، كو ل 27ـێ ئادارا ئەڤسالە، بانکا تی بی ئای ب نڤیسارەكا فەرمی وەزارەتا دارایی یا هەرێما کوردستانێ ئاگاهدارکر، کو دڤێت پشكداری پرۆسەیا بجهكرنا مووچەی بکەن، وەزارەتا دارایی یا هەرێما کوردستانێ ژی ل 28ـێ هەیڤا چار، ب ڕێكا نڤیسارەكێ دیاركر، د ڕازینە بانکا بازرگانییا عیراقێ پشكداریێ د پرۆژەیێ ”هەژمارا من” دا بکەت.
