وەزیرێ باژێرڤانی و گەشتوگوزارێ ل دۆر دابەشكرنا پارچێن ئەردی دیاركر: “پێدڤییە ل سنوورێ باژێرڤانیان پارچێن ئەردی بۆ فەرمانبەران بهێنە دابینكرن و ئەو باژێرڤانییێن كو پارچێن ئەردی نەبن ل جهێن دی بهێنە دابینكرن”.
د ڕاگەهاندنەكێدا ئەڤرۆ ب سەرپەرشتییا ساسان عەونی، وەزیرێ باژێرڤانی و گەشتوگوزارێ و ب ئامادەبوونا شیرەتكار و ڕێڤەبەرێن نەخشەدانانا ئاڤەدانی و یاسا ل وەزارەتا باژێرڤانی و گەشتوگوزار و ڕێڤەبەرێن گشتییێن باژێرڤانیان و سەرۆكێن باژێرڤانیان ل هەمی پارێزگەهـ و ئیدارەیێن سەربەخۆ یێن هەرێما كوردستانێ كۆمبوونەكا تایبەت ب ڕێكارێن دابەشكرنا پارچێن ئەردی هاتە ئەنجامدان.
ئاماژە ب هندێ هاتە كرن، د كۆمبوونێدا دویڤچووین بۆ كارێن پرۆسەیا دابەشكرنا پارچێن ئەردی هاتە كرن، كو د چەند ڕۆژێن دەستپێكێ دا ژ لایێ وەزارەتا باژێرڤانی و گەشتوگوزێ داخواز ژ هەمی باژێرڤانییان هاتبووكرن دەست ب ڕێكارێن پرۆسەیێ بكەن.
هەروەسا وەزیرێ باژێرڤانییێ دووپات ل سەر دیاركرنا ستافەكێ تایبەت ل باژێرڤانییان بۆ ب رێڤەبرنا پرۆسەیێ كر و ئاماژە ب هندێ كر: “دابەشكرنا پارچێن ئەردی د بەرژەوەندییا گشتییا وەلاتیان دایە و پێدڤییە ئەو پرۆسە بلەز و ب ڕێكوپێكی بهێتە ئەنجامدان.”
