نێچیرڤان بارزانی، سەرۆكێ هەرێما كوردستانێ ب هەلكەفتا 48ەمین سالڤەگەرا شوڕەشا گۆلانێ، پەیامەك بەلاڤكر.
دەقێ پەیاما سەرۆكێ هەرێمێ:
ددەمەكی دا ئەڤرۆ یادا سەربلند یا چل و هەشت سالییا بەرپابوونا شۆڕەشا گۆلانێ دكەین، سلاڤان بۆ گیانێ پاك یێ شەهیدان دهنێرین و ب ڕێزڤە وان ل بیرا خۆ دئینین.
شۆڕەشا گۆلانێ ڕابوونەكا شكۆمەندانە یا مللەتەكی بوو كو ل پێناڤی ئازادی و سەرفەرازییێ ئامادەی گیانبەخشین و هەمی قۆربانیدانەكێ بوو. د شۆڕەشا گۆلانێ دا، گەلێ كوردستانێ سەلماند كو چ جاران دەستان نا داهێلیت و ئارمانج و پەیاما شۆڕەشا مەزن یا ئەیلوولێ ب ڕابەراتییا بارزانییێ نەمر هەتا سەركەفتنێ یا بەردەوامە.
كۆمبوونا هێز و لایەنێن كوردستانێ ب دەورێ ئارمانجەكا بلند، بەرهەمێ شۆڕەشا گۆلانێ بوو كو ل دوماهییێ ڕاپەرینا ئادارا 1991 سەرخست و ئازادی و فیدڕالی و قەوارێ دەستووری یێ هەرێما كوردستانێ د دویڤدا هات. د ڤێ بیرەوەرییێ دا دۆپاتییێ ل لێكتێگەهشتنا هەڤپشك دكەین كو نوكە و داهاتوویەكێ باشتر بۆ گەلێ كوردستانێ مسوگەر دكەت.
یادا شۆڕەشا گۆلانێ بلند و پیرۆز بیت، سلاڤ ل گیانێ پاك یێ شەهیدان.
