کۆمیتەیا ناڤەندییا پارتی دیموکراتی کوردستان ب سەرۆکایەتیا جەنابێ سەرۆك بارزانی کۆمبوو و شەش خاڵ گۆتوبێژکرن و چەندین بڕیار د ئەوێ دەربارێ دا
دەرکرن کو ئەڤە دەقێ وێیە:
ب سەرپەرشتیا جەنابێ سەرۆك مەسعود بارزانی، کۆمیتەیا ناڤەندییا پارتیا مە، ئەڤرۆ ئێکشەمبی 26 ئەیارا 2024 ل سەلاحەددین، ب ئامادەبوونا جێگرێن سەرۆکی و ئەندامێن کۆمیتەیا ناڤەندی و یەدەکان و بەرپرسێن لقان کۆمبوونا خۆ یا بەرفرەهــ ئەنجامدا.
پشتی ڕاوستیانا ڕیزگرتنێ ل گیانێ پاک یێ شەهیدێن کوردستانێ و سەروەرێ وان بارزانییێ نەمر و کاک ئدریسێ هەردەم ل هزر، کۆمبوون ل ڕۆژەکا پیرۆز و دیرۆکی ئەنجامدا، ب پیرۆزباهییا 26 گۆلانێ، 38 سالیا دەستپێکرنا شۆڕەشا گۆلانێ، ئەو شۆڕەشا کو حەز و پیلانا دوژمنێن کوردستانێ کریە خەونەکا بجهـ نە هاتی، دەستپێکر.
پاش چەند پرسێن گرنگ و پێدڤی ئێخستنە د دانوستاندێدا، ئەو بابەت و تەوەرێن خوارێ بڕیارا پێدڤی بۆ وەرگێرا؛
تەوەرێ ئێكێ: پەیوەندییێن مە ل گەل وەلاتێن دەوروبەر:
پەیوەندییێن مە ل گەل كۆمارا ئیسلامییا ئیرانێ، كو ئەڤرازی و نشیڤی ب خۆڤە دیتینە و دەمەكە ساراتی و لێكتێنەگەهشتن ب پەیوەندییێن مە ڤە دیاربوو، سەڕەرای كو پەیوەندییێن مە پێشینەكا دێرین و باش هەبوویە و پشتی پەیوەندیكرن و بزاڤكرن بۆ ئاسایكرنا پەیوەندییان ب بەرچاڤگرتنا بەرژەوەندیا هەڤپشك یا هەردوولایان، بزاڤا ئاسایكرنێ ئەنجام هەبوو، هیڤیدارین ب ئاراستەیێ ڕێزگرتن و لێكتێگەهشتن پەیوەندییێن مە ڤەگەڕنە ئاستێ خۆ ئاسایی.
پارتی:
پەیوەندییێن مە ل گەل كۆمارا توركیا ب بزاڤێن هەردوو لایان و لێكتێگەهشتن و ڕێزگرتنا بەرامبەر و پاراستنا بەرژەوەندییان، ئاراستەیێ خۆ یێ ئاساییی وەرگرتە ڤە و هاتنا سەرۆككۆمارێ توركیا ئەردوگانی بۆ كوردستانێ، لەرزینەكا ئەرێنی و باش دایە پەیوەندییێن مە.
پەیوەندییێن مە ل گەل وەلاتان و دەولەتێن دی یێن جیهانێ، ب تایبەتی ل گەل ئەمریكا و ئەورۆپا د ئاستەكێ باش دانە و كۆمبوون و سەرەدانێن شاندێن وەلاتان و سەرەدانا شاندێن مە د هاتنوچوونێن بەردەوام و ئاستەكێ باشدانە، پێدڤییە ژ پێخەمەت بەرژەوەندییا هەرێما كوردستانێ گرننگی پێ بهێـەداتن و لڤینێن دبلۆماسی بهێزتر بكەین.
