ئاژانسا خانی:
د. نەوزاد هێتۆتی، مامۆستایێ زانستێن سیاسی ل زانکۆیا سەلاحەدین ل هەولێرێ، بۆ ئاژانسا خانی دیار کر: ژ بەر چەندین ئەگەران حکومەتا عێراقێ مووچەیێ هێزێن پێشمەرگەیی گیرودکەت و ناهنێریت و بەغدا وەدکەت، داکو حکومەتا هەرێما کوردستانێ نەچار بکەت مەلەفێ هێزێن ئەمنی رادەستی حکومەتا عێراقێ بکەت، دیسا بەهانەیا نەهنارتنا ناڤان ژ لایێ بەغداڤە ب تنێ ئەوە، کو حکومەتا عێراقێ دڤێت هەموو هوورکاری و زانیارییێن هێزێن ئەمنی و پێشمەرگەیی بدەستڤە بینیت و ئەڤە ژی دێ مەترسییێ بۆ سەر ئاسایشا هەرێما کوردستانێ دروست کەت، چونکی ئەو ناڤە راستەخۆ دێ هێنە رادەستکرن بۆ میلیشیاتێن شیعی و نەیارێن هەرێما کوردستانێ، د هەمان دەمدا عێراقێ دڤێت هەڤرکییێ دناڤبەرا فەرمانبەرێن مەدەنی و ئەمنی دا ل هەرێما کوردستانێ دروست بکەت.
ناڤهاتی گۆت ژی: عێراقێ دڤێت دلسارکرنەکێ لدەف پێشمەرگەیی پەیدا بکەت کو حەزژێکرن بۆ ئاخ و وەلاتێ خۆ نەبیت، هەروەسا هاندانا هێزێن ئەمنی و پێشمەرگەیی بۆ هندێ وەک خۆنیشاندەرێن سلێمانییێ داخوازا هندێ بکەن، نەکو هەر مووچەیێن وان بێخنە سەر بەغداڤە، بەلکو ناڤێن وان ژی ڕادەست بکەن، دیسا ب دوور نزانم ئەڤە ببیتە بەهانەیەک کو سلێمانی هێزێن پێشمەرگەیی و ئەمنی بێخیتە سەر بەغداڤە.
