لژنا ئاسایش و بەرگرییێ: هووربینی د لیسته‌یێن هێزێن ئەمنی یێن هەرێما کوردستانێ تەمام بووینە و مووچەیێن وان دێ هێنه‌ هنارتن

هووربینى د لیسته‌یێن مووچەىێن هێزێن ئەمنی یێن هەرێما کوردستانێ ژ لایێ دیوانا چاڤدێریىا دارایی تەمام بووینە و ئه‌و لیستە ب کۆد هاتییه‌ هنارتن و لڤان نێزیکان مووچەیێن وان دێ هێنه‌ هنارتن.

سەگڤان سندى، جێگرێ سەرۆکێ لژنا ئاسایش و بەرگرییێ ل پەرلەمانێ عێراقێ دیار كر، “رێکارێن هووربینییێ د لیسته‌یێن مووچەیێن هێزێن ئەمنی یێن هەرێما کوردستانێ ژ لایێ دیوانا چاڤدێریىا داراییڤه‌ تەمام بووینه‌” هه‌روه‌سا هه‌تا نوكه‌ پارێ مووچەىێ هێزێن ئەمنی بۆ هه‌یڤا نیسانێ ژ لایێ وەزارەتا داراییا فیدرالیڤە نەهاتییه‌ هنارتن، کو نێزیکى 300 ملیار دینارایە.

بەغدا داخواز دكه‌ت” ناڤ و زانیارییێن هه‌موو هێزێن ئەمنی بۆ وان بهێنه‌ هنارتن، بەلێ حکومەتا هەرێما کوردستانێ دڤێت ب کۆد بۆ ڤرێكه‌ت و بهێنه ‌هووربینی كرن.

سەگڤان سندى گۆت ژی، “ناڤێن کارمەندێن هێزێن ئەمنی د لیستا مووچەیی دا ب کۆد هاتییه‌ هنارتن و ب وی ره‌نگی هاتییه هووربینى کرن و ل ڤان نێزیكان مووچەیێ وان ژ لایێ وەزارەتا داراییا فیدرالیڤە دێ هێته‌ هنارتن.