نێچیرڤان بارزانی، سەرۆكێ هەرێما كوردستانێ ئەڤرۆ د پشكداریكرن د ئاهەنگا دەرچوونێ یا زانكۆیا ئەمریكی یا كوردستانێ دا ل دهۆكێ گۆتارەك پێشكێشكر و ڕاگەهاند، كوردستانەكا بهێز پێدڤی ب نڤشەكێ شارەزا هەیە.
سەرۆكێ هەرێما كوردستانێ دیاركر ژی، ل گەل حكومەتا فیدرال و لایەنێن سیاسی یێن عیراقێ لێكتێگەهشتن هەیە بۆ چارەسەركرنا ئاریشەیان، ئەڤە ژی سەقامگێریا سیاسی دروست دكەت.
نێچیرڤان بارزانی، سەرۆكێ هەرێما كوردستانێ سوپاسییا ڕۆلێ سەرۆكوەزیرێن عیراقێ محەمەد شیاع سوودانی، سەركردە و لایەنێن عیراقێ كر بەرامبەر هاریكارییا وان، هەروەسا دەستخۆشی ل مەسرور بارزانی، سەرۆکوەزیرێن هەرێما کوردستانێ كر بۆ لێكگەهشتن ل گەل بەغدا و هەمی هاریكاری و پشتەڤانییەكێ بۆ بزاڤێن وی.
نێچیرڤان بارزانی دووپات كر، کو هەرێما کوردستانێ بۆ هەردەم فاکتەرێ ئارامی و سەقامگیری و پاراستنا ئاشتی ل دەڤەرێ دێ مینیت.
