سەرۆكێ حكومەتا هەرێما كوردستانێ پێشوازی ل بالیۆزێ بریتانیا ل عیراقێ كر و چەندین بابەت گوتوبێژكرن.
ئەڤرۆ ڕۆژا چارشەمبی مەسرور بارزانی، سەرۆکێ حکومەتا هەرێمێ پێشوازی ل ستیڤن هیچن، بالیۆزێ بریتانیا ل عیراقێ کر و د كۆمبوونەكێ دا كو جەیمس گۆلدمان، کۆنسۆلێ گشتی یێ بریتانیا ل هەرێمێ ژی ئامادە بوو، بیروڕا ل دۆر بزاڤێن چارەسەركرنا كێشەیێن دناڤبەرا هەرێما كوردستانێ و حكومەتا فیدڕال دا هاتنە گوتوبێژكرن و سەرەدانا حەفتییا بووری یا سەرۆكوەزیران بۆ بەغدا و کۆمبوونێن وی ل گەل بەرپرسێن بلند یێن حكومەتا فیدڕال و لایەنێن سیاسی، ب پێنگاڤەكا گرنگ هاتەدانان بۆ چارەسەرکرنا کێشەیان، ب تایبەتی ماف و شایستێن دارایی یێن هەرێما كوردستانێ ب شێوەیەکێ بنەڕەتی و ل سەر بنەمایێ دەستووری و ڕێککەفتنان و کارناما حکومەتا فیدرال.
هەروەسا گوتوبێژ ل دۆر پڕۆژێ ڕێیا گەشەپێدانێ و پێكڤەگرێدانا وەلاتێن کەنداڤی ب ڕێیا هێلا ئاسنی یا عیراقێ ڤە ب تورکیا و وەلاتێن ئەوڕوپا هاتەكرن و دۆپاتی ل پێدڤییا پشكداربوون و دەربازبوونا وێ ب هەرێما كوردستانێ دا و سوودمەندبوونا هەمی پێکهاتە و دەڤەرێن عیراقێ ژ ڤی پڕۆژێ ستراتیژی.
تەوەرەکێ دی یێ گوتوبێژان، پێدڤییا ئەنجامدانا هەلبژارتنێن پەڕلەمانێ كوردستانێ بوو د دەمەكێ گونجای یێ ئەڤسالە دا و هەردوولا د هەڤڕابوون ل سەر گرنگییا چارەسەرکرنا هەمی کێشە و گرفتێن بەرامبەر هەلبژارتنان و پشكداربوونا هەمی لایەنێن سیاسی و پاراستنا مافێن پێكهاتەیان.
