ئاژانسا خانی:
ڕێڤەبەرێ كۆچ و كۆچبەرێن دهۆكێ بۆ ئاژانسا خانی ڕاگەهاند، هەرچەندە ڤەگەڕیانا ئارەزوومەندانە یا ئاواران دەستیپێکریە، لێ ژبەر وێرانبوونا شنگالێ ئاوارە کێم ڤەدگەڕن، لدویڤ بڕیارەكا حكومەتا عیراقێ هەر مالباتەكا ڤەگەڕیت دێ كۆژمێ چار ملیۆن دیناران وەرگریت، لێ بۆ نویژەنكرنا خانییێن وێرانكری ب لایەنێ كێم وان پێدڤی ب 20 ملیۆن دینارایە.
پیر دەیان پیر جەعفەر، ڕێڤەبەرێ كۆچ و كۆچبەرێن دهۆكێ دیار ژی كر، د نوكەدا حکومەتا عیراقێ هەمی هاریكاری بۆ كەمپێن ئاواران ڕاگرتینە و ڕاگرتنا هاریكارییان بۆ هندێ یە ئاوارە نەچار ببن ڤەگەڕن.
نوكە خزمەتگۆزارییێن کارەب، ئاڤ، کۆمکرنا گلێشی، ساخلەمی و پەروەردێ كەفتینە سەر ملێن حكومەتا هەرێمێ و بگۆتنا ڕێڤەبەرێ كۆچ و كۆچبەرێن دهۆكێ ” سالانە ئەو خەرجی ئێك ملیار و 838 ملیۆن دینار ل سەر حکومەتا هەرێما کوردستانێ دكەڤیت. “
لدویڤ بڕیارەكا وەزارەتا كۆچ و كۆچبەرێن عیراقێ، پێدڤییە هەتا 30-07-2024 سەرجەم کەمپێن هەرێما کوردستانێ بهێنە چۆلكرن و ئاوارە پشتی وەرگرتنا قەرەبوویێ ڤەگەڕنە سەر جهـ و وارێن خۆ.
لدویڤ زانیارییان، نێزیكی 63 هزار مالباتێن ئاوارە ل سنۆرێ پارێزگەها دهۆكێ دژین، 25 هزار ژوان دناڤ كەمپان دا كو 92% یاوان كوردێن ئێزدی نە. 15 كەمپ تایبەتن ب ئاوارێن شنگالێ و 5 كەمپ ژی تایبەتن ب ئاوارێن ڕۆژئاڤایێ كوردستانێ و 37 هزار و 800 خێزانێن ئاوارە ژی ل دەرڤەی كەمپان دژین.
