جڤاتا وەزیرێن هەرێما كوردستانێ ئەڤرۆ ب سەرپەرشتییا سەرۆکوەزیران مەسرور بارزانی و ئامادەبوونا قوباد تالەبانی، جێگرێ سەرۆکوەزیران كۆمبوو.
د بڕگا ئێكێ یا كۆمبوونێدا، ڕاپۆرتا سالا دووێ یا بجهئینانا پلانا حکومەتا هەرێما کوردستانێ بۆ مافێن مرۆڤی (2025-2021) ژ لایێ دیندار زێباری، ڕێکخەرێ ڕاسپاردا نیڤدەولەتی هاتە بەرچاڤكرن، پشتی ئەڤێ پلانێ ل هەیڤا نەهـ یا سالا 2021ـێ ژ لایێ جڤاتا وەزیران ڤە هاتیە پەسەندكرن و کەتیە د بیاڤێ بجهئینانێ دا.
د ڕاپۆرتێدا، پێزانینێن پێدڤی ل دۆر كار و پێنگاڤێن حكومەتا هەرێمێ تایبەت ب باشترکرنا ڕەوشا چاکسازیی و گرتیخانان، بەرهنگابوونا ماددێن هۆشبەر و کارتێکەرێن عەقلی و بازرگانیکرن ب مرۆڤان هاتە بەرچاڤكرن.
جڤاتا وەزیران، وەزارەت ڕاسپارد كو د بەردەوام بن د پێنگاڤان بۆ بجهئینانا پلانا پەسەندکری وەك پشكەك ژ کارنامە و پلانا کابینەیا نەهێ.
د بڕگا دووێ دا، بێگەرد تالەبانی، وەزیرا چاندن و ژێدەرێن ئاڤێ، ڕاپۆرتەك ل دۆر دووماهی هەلویستێ حکومەتا فیدرال كو تایبەت ب وەرگرتنا گەنمێ جووتیارێن هەرێما کوردستانێ و ڕاسپاردە و پێشنیارێن وەزارەتێ بەرچاڤكرن.
جڤاتا وەزیران، وەزارەتا چاندنێ ڕاسپارد كو كارێ پێدڤی بكەن ل سەر ئەو پێشنیارێن كۆمبوونێ هاتینە دیاركرن ب ئاراستەیی مفا وەرگرتن ژ گەنمێ جووتیارێن هەرێمێ د چارچووڤێ پلانەكا گونجایی دا.
د كۆمبوونێدا ڕێنمایێن جڤاتا وەزیران بۆ شاندێ دانوستاندكەر دووپات كرن كو هەلویستەكێ ب ڕژدی بكەن كو حکومەتا هەرێما کوردستانێ ڕێككەڤتنەكا زویكا بكەن د چارچووڤێ دەستووری بۆ دەستپێكرنا هنارتنا نەفتا هەرێمێ ب ڕێكا کۆمپانیا سۆمۆ.
