ڕۆژا 7/6/2017، د ڕۆژەكا وەكی ئەڤرۆ دا د كۆمبوونا پارت و لایەنێن سیاسی یێن هەرێما كوردستانێ دا ب سەركردایەتییا سەرۆك بارزانی، بڕیار ل سەر ئەنجامدانا ڕیفراندۆمێ بۆ سەربەخۆییا كوردستانێ هاتەدان.
ل دۆر ڤێ ڕۆژێ سەرۆك بارزانی د نامەیا خۆ دا نڤێسی یە: ” كۆمبوونا ڕۆژا 7/6/2017، یا دیرۆكی و گرنگ بوو و دەستكەفتەكا ب بها یە بۆ گەلێ كوردستانێ و قۆربانیدانا شەهیدان، شانازییەكا مەزن ژی یە بۆ هەمی ئەو لایەنێن پشكداری كۆمبوونێ بووین و بڕیارا دیرۆكی داین داكو گەلێ كوردستانێ بشێت ب ڕێیا ڕیفراندۆمێ دەنگ و هیڤییا خۆ ب جیهانێ بگەهینیت. “
دهێتە زانین، بەری حەفت سالان و ل ڕۆژا 25/9/2017، ڕیفڕاندۆما سەربەخۆییێ ل هەرێما کوردستانێ و دەڤەرێن کوردستانی یێن دەرڤەی ئیدارا هەرێما کوردستانێ هاتە ئەنجامدان، سێ ملیۆن و 305 هزار و 925 کەسان پشكداری تێدا کر و ژ وێ ژمارێ، دوو ملیۆن و 861 هزار و 471 کەسان ب بەلێ دەنگ بۆ سەربەخۆییا کوردستانێ دا، کو دبیتە زێدەتر ژ 92% یا بەشداربوویان.
