وەزارەتا پەروەردێ یا حکومەتا هەرێما کوردستانێ ئەڤرۆ دەم و ڕێنماییێن وەرگرتنا زارۆكان ل باخچەیێن زارۆكان و قوتابییێن ل قوتابخانان بەلاڤكر و ئاماژە ب هندێ كر، كو تۆماركرنا زارۆكان ل باخچان و قوتابییان بۆ پۆلا ئێكێ بنەرەت، دەرچوویێن پۆلا شەشێ بنەرەت و نەهێ بنەرەت ل ناڤەندێن خواندنێن حكومی، ل ڕۆژا دووشەمبی 24-06-2024ـێ دەستپێدكەت هەتا ڕۆژا پێنجشەمبی 22-08-2024ـێ دێ ب دووماهی هێت.
ل دویڤ ڕێنماییێن وەزارەتا پەروەردێ، وەرگرتنا زارۆكێن قوناغا ئێكێ بۆ باخچان، دڤێن ژ دایكبوویێن 01-01 هەتا 31-12-2020ـێ بن، قوناغا دووێ ئەگەر باخچەی جهـ هەبیت دڤێن ژدایكبوویێن 01-01 هەتا 31-12-2019ـێ بیت.
هەروەسا ل دویڤ ڕێنماییێن وەزارەتا پەروەردێ، وەرگرتنا قوتابییان بۆ پۆلا ئێكێ بنەرەت، دێ بۆ ژ دایكبوویێن 01-01هەتا 31-12-2018ـێ بیت، پێدڤییە ڕۆژانە ناڤەندێن خواندنێ داتایێن نوی ل سیستەمێ پەروەردێ تۆمار بكەن.
