نوینەرێ حکومەتا هەرێما کوردستانێ ل ئیرانێ ڕاگەهاند، سوبەهی ڕۆژا پێنجشەمبی عەلی باقری، سەرپەرشتێ كاروبارێن وەزارەتا دەرڤە یا ئیرانێ دێ ب سەرەدانەكێ گەهیتە بەغدا و ڕۆژا ئەیینی دێ سەرەدانا هەولێرێ و د دویڤدا سلێمانییێ كەت.
نازم عومەر دەباغ، نوینەرێ حکومەتا هەرێما کوردستانێ ل ئیرانێ دیار ژی كر، عەلی باقری ل هەولێرێ دێ ل گەل هەرئێك ژ سەرۆك مەسعود بارزانی و نێچیرڤان بارزانی، سەرۆکێ هەرێما کوردستانێ و مەسرور بارزانی، سەرۆکێ حکومەتا هەرێمێ كۆمبیت و پاشی دێ چیتە سلێمانییێ و ل گەل بافل تالەبانی، سەرۆکێ ئێكەتی نشتیمانی کوردستان کۆمبیت.
ل دۆر ئارمانجێن سەرەدانێ نازم دەباغ دیار كر، مەرەم ژ سەرەدانا وی پێشڤەبرنا پەیوەندییێن ئیرانێ و هەرێما كوردستانێ یە و دویڤچوون دێ هێتەكرن بۆ وان ڕێككەفتنامێن د دچارچووڤێ سەرەدانا نێچیرڤان بارزانی دا بۆ تەهرانێ هاتینەكرن د بوارێن ئابووری، سیاسی و ئەمنی.
عەلی باقری پشتی گیان ژدەستدانا حوسێن ئەمیرعەبدوللاهیان، وەزیرێ دەرڤە یێ ئیرانێ ل گەل ئیبراهیم رەئیسی، سەرۆکێ وی وەلاتی د ڕویدانا كەفتنا هەلیكۆپتەرێ دا، ئەركێ سەرپەرشتییا وەزارەتا دەرڤە یا وەلاتێ خۆ وەرگرتییە و پشتی وەرگرتنا وی پۆستی ئەڤە دێ ئێكەم سەرەدانا وی بیت بۆ عیراقێ وهەرێما كوردستانێ.
